Ronnie Foden: भारतात वर्ल्डकप जिंकणाऱ्या इंग्लिश खेळाडूचा 4 वर्षांचा मुलगा होणार लखपती! एका जाहिरातीतून कमावणार 'इतके' पैसे

Phil Foden Four years Son Ronnie set to earn £10,000 for each brand endorsement reports :

जगभरात सध्या सोशल मीडियाची क्रेज मोठ्या प्रमाणात आहे. सोशल मीडियातून अनेकजणांनी स्टारडमही मिळवले आहे, यात इंग्लंड आणि मँचेस्टर सिटीचा २३ वर्षीय स्टार फुटबॉलपटू फिल फोडन याचा चार वर्षांचा मुलगा रोनी फोडन याचाही समावेश आहे.

रोनीचे इंस्टाग्रामवर वैयक्तिक अकाउंटही असून त्याला जवळपास ४ मिलियन फॉलोवर्स आहेत. गेल्या हंगामात मँचेस्टर सिटीने चॅम्पियन्स लीग जिंकल्यानंतर रोनी अधिक प्रकाशझोतात आला होता.

मँचेस्टर सिटीच्या विजयाच्या सेलिब्रेशनमध्ये तो आपल्या वडिलांसह सहभागी झाला होता. त्याचे या सेलिब्रेशनदरम्यानचे अनेक फोटोही व्हायरल झाले होते. यावेळी त्याने स्टार खेळाडू एर्लिंग हालंडबरोबरही मस्ती करताना दिसला होता.

त्यानंतर त्याच्या इंस्टाग्राम अकाऊंडलाही मोठ्या प्रमाणात फॉलोवर्स मिळाली. त्याचे हे अकाउंट त्याचे आई-बाबा सांभाळतात. आता असे समजत आहे की त्याने एका मॉडेलिंग एजन्सीबरोबर करार केला आहे.

द सनने दिलेल्या वृत्तानुसार रोनीने प्रोपेल टॅलेंट ग्रुपसोबत मॉडेलिंगसाठी करार केला आहे. आता या करारातून त्याला प्रत्येक ब्रँडच्या जाहिरातीसाठी 10,000 पाउंड (भारतीय चलनानुसार साधारण साडे दहा लाख रुपये) मिळणार आहेत. विशेष म्हणजे यापूर्वी देखील रोनीने वेगवेगळ्या फॅशन ब्रँडच्या जाहीराती केल्या आहेत.

रोनी अल वे आणि द ड्युड या टोपन नावानेही ओळखला जातो. त्याच्या इंस्टाग्राम अकाउंटवर त्याच्या आई-बाबांनी त्याचे अनेक फोटो आणि व्हिडिओही शेअर केले आहेत, ज्याला फुटबॉल चाहत्यांकडून मोठ्या प्रमाणात पसंती मिळत असते.

फोडनने भारतात जिंकलाय वर्ल्डकप

साल 2017 मध्ये भारतात 17 वर्षांखालील फिफा वर्ल्डकप खेळवण्यात आला होता. त्यावेळी फोडन विजेतेपद मिळवलेल्या इंग्लंड संघाचा भाग होता.

त्याने या स्पर्धेचे विजेतेपद इंग्लंडला मिळवून देण्यातही मोलाचा वाटा उचलला होता. अंतिम सामन्यात त्याने स्पेनविरुद्ध 2 गोल नोंदवले होते. तसेच तो गोल्डन बॉलचा मानकरीही ठरला होता.