जीसीए प्रीमियर लीग क्रिकेट सामन्यात धेंपो क्लब पराभवाच्या छायेत

पणजी : जीनो स्पोर्टस क्लबच्या प्रभावी गोलंदाजीसमोर धेंपो क्रिकेट क्लबची दुसऱ्या डावातही घसरगुंडी उडाली, त्यामुळे जीसीए प्रीमियर लीग क्रिकेट सामन्यात ते पराभवाच्या छायेत आले. आणखी एका लढतीत करिमाबाद क्रिकेट क्लबने साळगावकर क्रिकेट क्लबवरील वर्चस्व कायम राखताना आघाडी वाढविली.

सांगे येथील जीसीए मैदानावर जीनो क्लबने पहिल्या डावात 112 धावांची आघाडी प्राप्त केली. नंतर धेंपो क्लबची मंगळवारी सामन्याच्या दुसऱ्या दिवसअखेर 9 बाद 176 अशी दाणादाण उडाली. त्यांच्यापाशी आता 64 धावांचीच आघाडी आहे. पहिल्या डावात 7 गडी बाद केलेला जीनो क्लबचा वेगवान गोलंदाज ऋत्विक नाईक याने दुसऱ्या डावात ३ गडी बाद करून सामन्यात 10 विकेट टिपण्याचा पराक्रम साधला. जीनो क्लबचे फिरकी गोलंदाज अमूल्य पांड्रेकर व मोहित रेडकर यांनीही दुसऱ्या डावात प्रत्येकी 3 गडी बाद केले.

कांपाल येथील पणजी जिमखान्याच्या भाऊसाहेब बांदोडकर मैदानावर सनत म्हापणे (4-46) याच्या प्रभावी माऱ्यामुळे करिमाबाद संघाला 142 धावांची आघाडी मिळाली. त्यांनी साळगावकर क्लबचा पहिला डाव 103 धावांत गुंडाळला. नंतर दुसऱ्या दिवसअखेर दुसऱ्या डावात 1 बाद 26 धावा करून करिमाबाद क्लबने एकूण आघाडी 168 धावांपर्यंत नेली.

संक्षिप्त धावफलक

धेंपो क्रिकेट क्लब, पहिला डाव : 127 व दुसरा डाव : 53 षटकांत 9 बाद 176 (करण वशोदिया 20, उदित यादव 31, स्नेहल कवठणकर 33, योगेश कवठणकर 16, मलिक सिरूर 42, ऋत्विक नाईक 3-41, अमूल्य पांड्रेकर 3-61, मोहित रेडकर 3-68) विरुद्ध जीनो स्पोर्टस क्लब, पहिला डाव (3 बाद 117 वरून) : 69.1 षटकांत सर्वबाद 239 (अमोघ देसाई 58, समर दुभाषी 35, गौरीश कांबळी 45, मोहित रेडकर 16, अमूल्य पांड्रेकर नाबाद 27, ऋत्विक नाईक 18, हर्षद गडेकर 2-41, जगदीश पाटील 1-40, हेरंब परब 1-22, विकास सिंग 5-71).

करिमाबाद क्रिकेट क्लब, पहिला डाव : 245 व दुसरा डाव : 8 षटकांत 1 बाद 26 (अझान थोटा 17, शुभम तारी 1-6) विरुद्ध साळगावकर क्रिकेट क्लब, पहिला डाव (5 बाद 62 वरून) : 41.5 षटकांत सर्वबाद 103 (वैभव नाईक 22, धीरज यादव 21, शुभम तारी नाबाद 11, लक्मेश पावणे 2-10, सनत म्हापणे 4-46, दीपराज गावकर 2-10, वेदांत नाईक 1-16).