स्पर्धेत जीएफए फुटबॉल धेंपो क्लबने वास्कोला बरोबरीत रोखले

पणजी : जीएफए अध्यक्षीय करंडक फुटबॉल स्पर्धेच्या सुपर लीग फेरीत धेंपो स्पोर्टस क्लबने पिछाडीवरून वास्को स्पोर्टस क्लबला 2-2 असे गोलबरोबरीत रोखले. आणखी एका सामन्यात एफसी गोवा आणि सेझा फुटबॉल अकादमीस 1-1 गोलबरोबरीमुळे प्रत्येकी एक गुण मिळाला.

म्हापसा येथील धुळेर स्टेडियमवर वास्को क्लब विश्रांतीला एका गोलने आघाडीवर होता. सॅव्हलन फर्नांडिसने 16व्या मिनिटास सामन्यातील पहिला गोल केला. नंतर 47व्या मिनिटास पेद्रू गोन्साल्विसच्या गोलमुळे धेंपो क्लबने बरोबरी साधली. 57व्या मिनिटास बीव्हन फर्नांडिसच्या गोलमुळे वास्को क्लबला पुन्हा आघाडी प्राप्त झाली. मात्र धेंपो क्लबच्या डॅरेल मास्कारेन्हास याने 68व्या गोल केल्यामुळे सामन्यात पुन्हा बरोबरी झाली.

साल्वादोर द मुंद येथील मैदानावरही एफसी गोवानेही पिछाडीवरून बरोबरीच्या गुणाची कमाई केली. महंमद फाहीझ याने 17व्या मिनिटास केलेल्या गोलमुळे सेझा अकादमीचा संघ आघाडीवर राहिला. 75व्या मिनिटास डेल्टन कुलासोने गोल केल्यामुळे एफसी गोवास पराभव टाळता आला.

मनोराची वेळसाव क्लबवर मात

स्पर्धेच्या पदावनती फेरीत मंगळवारी मडगाव येथील चौगुले महाविद्यालय मैदानावर यूथ क्लब ऑफ मनोरा संघाने वेळसाव स्पोर्टस अँड कल्चरल क्लबवर 3-1 असा चमकदार विजय मिळविला. वेळसावच्या कॅजिटन फर्नांडिसने 26व्या मिनिटास गोल केल्यानंतर मनोरा संघाने उत्तरार्धात तीन गोल नोंदवून सामना जिंकला. मनोरा संघास पूर्ण तीन गुण मिळवून देताना अर्घ्य रॉय याने 47व्या, बदली एल्डन कुलासोने 64व्या, तर महंमद फरिद याने 69व्या मिनिटास प्रत्येकी एक गोल केला.