'द वॉल' ला ब्रेक; झिम्बाब्वे दौऱ्यावर VVS Laxman टीम इंडियाचे मुख्य प्रशिक्षक

VVS Laxman: राष्ट्रीय क्रिकेट अकादमीचे प्रमुख व्हीव्हीएस लक्ष्मण हे आगामी झिम्बाब्वे दौऱ्यासाठी भारताचे कार्यकारी मुख्य प्रशिक्षक असतील. 27 ऑगस्टपासून यूएईमध्ये खेळल्या जाणाऱ्या मालिका आणि आशिया चषक यांच्यामध्ये फारच कमी अंतर आहे. भारतीय क्रिकेट बोर्डाचे (BCCI) सचिव जय शाह यांनी शुक्रवारी ही माहिती दिली.

दरम्यान, जय शाह (Jai Shah) यांनी सांगितले की, "होय, लक्ष्मण झिम्बाब्वे दौऱ्यावर खेळल्या जाणार्‍या तीन सामन्यांच्या वनडे मालिकेसाठी संघाची जबाबदारी (Coach) घेतील. राहुल द्रविड यांना विश्रांती दिली जात आहे, असे नाही. झिम्बाब्वेविरुध्दची (Zimbabwe) एकदिवसीय मालिका 22 ऑगस्ट रोजी संपणार आहे. त्यानंतर द्रविडसह भारतीय संघ (Team India) 23 ऑगस्ट रोजी यूएईला रवाना होईल. या दोन स्पर्धांमध्ये फार कमी अंतर आहे, त्यामुळे लक्ष्मण झिम्बाब्वेमध्ये भारतीय संघाची धुरा सांभाळतील.''

दुसरीकडे, झिम्बाब्वे 18, 20 आणि 22 ऑगस्ट रोजी हरारे येथे तीन एकदिवसीय सामने खेळणार आहे. लोकेश राहुल आणि दिपक हुड्डा हरारेहून दुबईला जाणार असल्याचेही शाह यांनी सांगितले.