चर्चिल ब्रदर्सला विजयाचा दिलासा

पणजी: तळात संघर्ष करणाऱ्या चर्चिल ब्रदर्सने (Churchill Brothers) गुरुवारी आयलीग फुटबॉल स्पर्धेत विजयाची नोंद केली. त्यामुळे त्यांना दिलासा मिळाला व गुणतक्त्यातील स्थानही सुधारले. गोव्यातील संघाने ऐजॉल एफसीवर 2-1 फरकाने मात केली.

चर्चिल ब्रदर्ससाठी महत्त्वाचा असलेला सामना पश्चिम बंगालमधील कल्याणी येथे झाला. त्यांचे दोन्ही गोल पूर्वार्धातील खेळात झाले. नायजेरियन खेळाडू केनेथ इकेचुक्वू याने 44व्या मिनिटास संघाला आघाडी मिळून दिल्यानंतर ताजिकिस्तानचा आंतरराष्ट्रीय खेळाडू कोमरॉन तुर्सुनोव याने 54-3व्या मिनिटास संघाची स्थिती बळकट केली. तुर्सुनोव सामन्याचा मानकरी ठरला. ऐजॉलचा एकमात्र गोल सॅम्युएल लालमुआनपुईया याने 59व्या मिनिटास थेट फ्रीकिक फटक्यावर नोंदविला.

चर्चिल ब्रदर्सने स्पर्धेत दुसऱ्या विजयाची नोंद केली. अन्य एक बरोबरी व चार पराभवासह त्यांचे सात गुण झाले असून बाराव्या स्थानावरून आठव्या क्रमांकावर येणे शक्य झाले. ऐजॉल एफसीला लागोपाठ दोन विजय नोंदविल्यानंतर स्पर्धेतील एकंदरीत पाचवा पराभव पत्करावा लागला. सात लढतीतून सहा गुण कायम राहिल्यामुळे ते नवव्या क्रमांकावर घसरले.

ब्राईस मिरांडा याच्या शानदार क्रॉसपासवर केनेथ याचा हेडर भेदक ठरला आणि चर्चिल ब्रदर्सला आघाडी मिळाली. पूर्वार्धातील भरपाई वेळेस केनेथच्या असिस्टवर कोमरॉन तुर्सुनोव याने अचूक नेम साधत प्रतिस्पर्धी गोलरक्षकाचा बचाव भेदला. स्पर्धेतील अन्य लढतीत गुरुवारी श्रीनिदी डेक्कनने इंडियन ॲरोजवर 2-1 अशी मात केली, तर सुदेवा दिल्लीला नेरोका एफसीने 1-1असे गोलबरोबरीत रोखले.