नामवंत बिलियर्डस-स्नूकरपटू मिरामारला खेळणार

पणजी : मिरामार येथील क्लब टेनिस द गास्पार डायस संकुलात या महिनाअखेरीस देशातील नामवंत बिलियर्डस-स्नूकरपटू खेळताना दिसतील. स्पर्धेत ३२ आंतरराष्ट्रीय पदके जिंकलेला दिग्गज खेळाडू पंकज अडवाणी याचे आकर्षण असेल. (Petroleum Inter-Divisional Competition from 25 in Goa)

ऑईल अँड नॅचरल गॅस लिमिटेड (ONGC) यांच्यातर्फे येत्या २५ ते २९ मार्च या कालावधीत १७ वी पेट्रोलियम संघांची बिलियर्डस-स्नूकर स्पर्धा गोव्यात (Goa) घेण्यात येईल. पंकज याच्याव्यतिरिक्त आलोक कुमार, रूपेश शाह, सौरव कोठारी, ध्रुव सितवाला या जागतिक पातळीवरील मातब्बर खेळाडूंचाही स्पर्धेत सहभाग असेल. ते यजमान ओएनजीसी संघातर्फे खेळतील.

स्पर्धेत पेट्रोलियम क्षेत्रातील पाच संस्थांचे संघ सहभागी होतील. इंडियन ऑईल (IOCL) संघात माजी जगज्जेता आदित्य मेहता, लक्ष्मण रावत, ब्रिजेश दमाणी, ध्वज हरिया यांचा असेल. भारत पेट्रोलियम (BPCL) संघात माजी जगज्जेता देवेंद्र जोशी, मनन चंद्रा, शाहबाज आदिल खान, एस. श्रीकृष्ण, क्रिश गुरबक्षानी या प्रमुख खेळाडूंचा समावेश आहे. तर ऑईल इंडिया लिमिटेड व नुमालीगढ रिफायनरी लिमिटेड (एनआरएल) हे स्पर्धेतील अन्य संघ आहेत. बिगरव्यावसायिक खेळाडूंच्या गटात गतविजेत्या आरिफ अख्तर खेळेल.