C K Naidu Trophy: राजस्थानच्या रोहन राजभर याने आक्रमक शैलीत शतक झळकावले. त्याच्या खेळीच्या जोरावर पाहुण्या संघाने 23 वर्षांखालील कर्नल सी. के. नायडू करंडक क्रिकेट स्पर्धेच्या एलिट ड गट सामन्यात गोव्याचा 9 विकेट्स राखून पराभव केला. दरम्यान, सांगे येथील जीसीए मैदानावर बुधवारी सामन्याच्या चौथ्या दिवशी लंचपूर्वीच राजस्थानने स्पर्धेतील तिसऱ्या विजयाची औपचारिकता पूर्ण केली होती. गोव्याच्या मोहिमेची सांगता पाचव्या पराभवाने झाली.
दरम्यान, भारतीय क्रिकेट नियामक मंडळाच्या (बीसीसीआय) 2023-24 मोसमातील गोव्याचा हा पुरुष गटातील अखेरचा सामना होता. राजस्थानने सहा सामन्यांतून 22 गुणांची कमाई करत तिसरा क्रमांक पटकावला होता. सहापैकी फक्त एक सामना जिंकलेल्या गोव्याचे सहा गुण कायम राहिले. त्यांना सात संघांच्या गटात सहावा क्रमांक प्राप्त झाला.
दुसरीकडे, राजस्थानसमोर विजयासाठी 182 धावांचे आव्हान होते. तिसऱ्या दिवसाअखेर त्यांनी बिनबाद 70 धावा केल्या होत्या. बुधवारी रोहन राजभर याने तूफानी फटकेबाजी केली. त्याच्या शतकी खेळीच्या जोरावर राजस्थानने गोव्याचा धुव्वा उडवला. रोहनने आपल्या तूफानी खेळीत 16 चौकार आणि 4 षटकार लगावले. अव्यांश सिंग (नाबाद 45) याच्या साथीने त्याने 176 धावांची शानदार भागिदारी केली. संघाला विजयासाठी सहा धावांची गरज असताना रोहन बाद झाला. अंशुल गढवाल (नाबाद 6) याने षटकार ठोकत राजस्थानच्या विजयावर शिक्कामोर्तब केला.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
