भारतीय क्रिकेटमध्ये युवा फलंदाज वैभव सूर्यवंशी सध्या चर्चेचा केंद्रबिंदू ठरला आहे. कमी वयात आक्रमक फलंदाजी करत त्याने क्रिकेटविश्वाचे लक्ष वेधून घेतले आहे. IPLमधील दमदार कामगिरीनंतर त्याच्या फलंदाजीचे अनेक दिग्गजांकडून कौतुक होत आहे. मात्र, त्याचवेळी त्याच्या वयाबाबत सोशल मीडिया आणि क्रिकेटविश्वात वारंवार प्रश्न उपस्थित केले जात आहेत. आता ऑस्ट्रेलियाचा माजी वेगवान गोलंदाज ब्रेट ली वैभवच्या समर्थनार्थ पुढे आला असून त्याने टीकाकारांना थेट प्रत्युत्तर दिले आहे.
एका यूट्यूब मुलाखतीदरम्यान ब्रेट लीने वैभव सूर्यवंशीच्या खेळाबद्दल विचारण्यात आले. त्यावेळी त्यांनी त्याच्या वयाभोवती सुरू असलेल्या चर्चेवर नाराजी व्यक्त केली. वैभव खरोखर 15 वर्षांचा असेल तर तेही कौतुकास्पद आहे आणि तो त्यापेक्षा मोठा असेल तरी त्याच्या क्रिकेट गुणवत्तेवर त्याचा परिणाम होत नाही, असा मुद्दा ब्रेट लीने मांडला.
त्याच्या मते, खेळाडूचे वय किती आहे यापेक्षा तो मैदानावर कशी कामगिरी करतो हे अधिक महत्त्वाचे आहे. वैभवमध्ये भारतीय क्रिकेटसाठी मोठी क्षमता असल्याचेही ब्रेट लीने नमूद केले.
IPLमधील वैभवच्या आक्रमक फलंदाजीने ब्रेट ली प्रभावित झाला आहे. विशेषतः वेगवान गोलंदाजांचा सामना करताना त्याने दाखवलेल्या आत्मविश्वासाचे त्याने कौतुक केले.
हैदराबादविरुद्धच्या सामन्यात वैभवने केलेल्या 97 धावांच्या खेळीचा संदर्भ देताना ली यांनी त्याच्या फलंदाजीतील ताकदीकडे लक्ष वेधले. वेगवान चेंडूंवर त्याने हुकसारखे आक्रमक फटके खेळले आणि त्यातून त्याचा नैसर्गिक आत्मविश्वास दिसून आला, असे त्याने सांगितले.
ब्रेट लीच्या मते, वैभवची खरी ताकद केवळ त्याच्या फलंदाजीत नाही तर त्याच्या मानसिक दृष्टिकोनातही आहे. इतक्या कमी वयात मोठ्या मंचावर खेळताना दबाव हाताळणे सोपे नसते. त्यामुळे या युवा खेळाडूवर अवास्तव अपेक्षांचे ओझे टाकू नये, असा सल्लाही त्याने दिला.
वैभव अजून लहान आहे आणि त्याला स्वतःचा खेळ विकसित करण्यासाठी वेळ दिला पाहिजे. त्याच्यावर सातत्याने प्रसिद्धी आणि अपेक्षांचा दबाव टाकण्याऐवजी त्याला खेळाचा आनंद घेऊ द्यावा, असे ली ने सूचित केले.
वैभव सूर्यवंशीने IPLमधील कामगिरीनंतर भारतीय संघातही स्थान मिळवले आहे. इंग्लंडविरुद्धच्या टी20 सामन्यात त्याला आंतरराष्ट्रीय क्रिकेटमध्ये पदार्पणाची संधी मिळाली. त्यामुळे आंतरराष्ट्रीय स्तरावर खेळणाऱ्या सर्वात कमी वयाच्या भारतीय क्रिकेटपटूंपैकी एक म्हणून त्याने नवा टप्पा गाठला.
यानंतर झिम्बाब्वेविरुद्धच्या टी20 मालिकेतही त्याने आपल्या आक्रमक फलंदाजीची झलक दाखवली. मालिकेतील दोन सामन्यांत त्याने वेगवान अर्धशतके झळकावत मोठ्या फटक्यांची क्षमता पुन्हा सिद्ध केली.
वैभवने अल्पावधीतच IPL आणि आंतरराष्ट्रीय क्रिकेटमध्ये आपली छाप पाडली आहे. त्यामुळे त्याच्याकडून भारतीय क्रिकेटला भविष्यात मोठ्या अपेक्षा आहेत. मात्र, या अपेक्षांसोबत त्याच्यावर दबाव वाढू नये, याकडेही लक्ष देणे गरजेचे आहे.
ब्रेट लींच्या प्रतिक्रियेमुळे वैभवच्या वयाभोवती सुरू असलेल्या चर्चेला पुन्हा उधाण आले असले तरी त्यांनी एक महत्त्वाचा मुद्दा अधोरेखित केला आहे—खेळाडूचे वय नव्हे, तर त्याची गुणवत्ता, मानसिकता आणि मैदानावरील कामगिरी त्याची खरी ओळख ठरवते.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.