गोव्याची भक्ती भारतीय बुद्धिबळ ऑलिंपियाड संघात

पणजी : चेन्नई येथे होणाऱ्या 44 व्या बुद्धिबळ ऑलिंपियाड स्पर्धेसाठी भारतीय संघात गोव्याची इंटरनॅशनल मास्टर भक्ती कुलकर्णी हिची निवड झाली आहे. स्पर्धा 28 जुलै ते 10 ऑगस्ट या कालावधीत होणार आहे.

बुद्धिबळ ऑलिंपियाड स्पर्धेसाठी अखिल भारतीय बुद्धिबळ महासंघाने 20 सदस्यीय संघाची सोमवारी घोषणा केली. पुरुष आणि महिला गटात भारताचे प्रत्येकी दोन संघ खेळतील. ऑनलाईन पद्धतीने 2020 मध्ये झालेल्या बुद्धिबळ ऑलिंपियाड स्पर्धेत भारताने रशियासह संयुक्त विजेतेपद मिळविले होते, विदित गुजराथी याच्या नेतृत्वाखालील संघात भक्तीचा समावेश होता.

महिलांच्या मुख्य संघात भक्तीसह कोनेरू हंपी, जागतिक क्रमवारीत दहाव्या स्थानी असलेली हरिका द्रोणवल्ली, तानिया सचदेव, आर. वैशाली यांचा समावेश आहे. ऑनलाईन स्पर्धेत खेळलेली भक्ती प्रत्यक्ष ऑलिंपियाडमध्ये पदार्पण करत आहे. पाच वेळचा जागतिक विजेता विश्वनाथन आनंद ऑलिंपियाड स्पर्धेत खेळणार नाही, मात्र तो भारतीय संघाचा मेंटॉर असेल.

भारताने 2014 साली बुद्धिबळ ऑलिंपियाडमध्ये ब्राँझपदक जिंकले होते. नंतर 2020 मध्ये ऑनलाईन ऑलिंपियाडमध्ये रशियासह संयुक्त सुवर्णपदक, तर 2021 साली ऑनलाईन ऑलिंपियाडमध्ये महिला संघाने ब्राँझपदक जिंकले होते.