पणजी : गेल्या काही वर्षांपासून चोडण बेटावरील पाण्याची समस्या गंभीर होत चालली आहे. पाणी साठवून ठेवण्यासाठी पंचायतीकडे 300 चौमी जमिनीची पूर्तता अजूनही न झाल्याने चोडण गावात दिवसाआड पाणीपुरवठा केला जातो व तोसुद्धा अपुरा होत असल्याची तक्रार ग्रामस्थांनी केली आहे.
यामुळे लोकांना खूप त्रास सहन करावा लागत आहे. पाण्‍याबरोबरच चोडणवासीयांना विजेची समस्‍याही सतावत आहे. वीज नसेल तर पाणीपुरवठ्यावर परिणाम होतो. पाणी खेचण्यासाठी बसविण्यात आलेले पंप फारच जुने झाल्याने त्‍यात आणखी भर पडत आहे, असे खात्याचे कनिष्ठ अभियंता अभिजीत नाईक यांनी सांगितले. काही दिवसांपूर्वी विजेच्या गडगडाटामुळे काराभाट येथील पॅपसेट जळाला. हा पॅपसेट जुना असल्याने दुरुस्तही होत नाही. शेवटी डिचोली तालुक्यातील खात्याकडे असलेल्या टँकरद्वारे पाणीपुरवठा करावा लागला.
सध्या चोडण बेटावर 6 जुने पंपसेट आहेत. नवीन पंपसेट बसविण्याची मान्यता आपण खात्याकडून घेतली आहे. यासाठी 8 लाख रूपये खर्च येणार आहे. त्‍यानंतर या सेवेत मोठी सुधारणा होऊ शकते, असे नाईक म्‍हणाले. तर, पाणी साठवून ठेवण्यासाठी पंचायतीने पुढाकार घेतल्‍यास पाण्याची समस्या मार्गी लागू शकते, असे एक ग्रामस्‍थ पुरुषोत्तम यांनी सांगितले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
