'आयपीएल'चे मीडिया हक्क विकून 'बीसीसीआय' होणार मालामाल

इंडियन प्रीमियर लीगमध्ये (आयपीएल) पैशांचा पाऊस पडतो हे सर्वांनाच माहीत आहे. आता भारतीय क्रिकेट नियंत्रण बोर्ड (BCCI) या स्पर्धेतून अधिक कमाई करण्याचा विचार करत आहे. (BCCI to make money by selling IPL broadcast rights)

बीसीसीआयने अलीकडेच आयपीएल मीडिया हक्कांसाठी टेंडर जारी केले आहे. हे टेंडर 2023 ते 2027 साठी आहे. बीसीसीआयने या टेंडरसाठी एकूण 33 हजार कोटी रुपये मूळ किंमत ठेवली आहे. सध्या हे टेंडर 74 सामन्यांनुसार ठरविण्यात आले असून, त्यात दहा संघ सहभागी होणार आहेत. मात्र, बीसीसीआयने (BCCI) टेंडरमधील सामन्यांची संख्या वाढवण्याचा पर्यायही ठेवला आहे.

बीसीसीआय 33 हजार कोटींची कमाई कशी करणार?
क्रिकबझच्या अहवालानुसार, बीसीसीआयला फक्त भारतीय उपखंडात आयपीएल (IPL) प्रसारित करण्यासाठी प्रति सामन्यासाठी 49 कोटी रुपये मिळतील. याशिवाय प्रक्षेपणाची डिजिटल किंमत प्रति सामन्यासाठी 33 कोटी रुपये ठेवण्यात आली आहे. अनेक कंपन्या टेंडरसाठी अर्ज करणार आहेत. लिलावात चुरशीची शर्यत असेल, असा अंदाज आहे. सध्या आयपीएल मीडिया अधिकार स्टार नेटवर्ककडे आहेत.