BCCI issued medical and fitness updates on 5 Indian Cricketers: भारतीय क्रिकेट संघातील काही खेळाडू सध्या दुखापतीतून सावरत आहेत. हे खेळाडू बंगळुरूमधील राष्ट्रीय क्रिकेट असोसिएशनमध्ये (NCA) त्यांच्या दुखापतीवर काम करत आहेत. या खेळाडूंपैकी 5 खेळाडूंबाबत बीसीसीआयने महत्त्वाचे वैद्यकिय अपडेट्स दिले आहेत.
बीसीसीआयने जसप्रीत बुमराह, ऋषभ पंत, प्रसिद्ध कृष्णा, श्रेयस अय्यर आणि केएल राहुल या पाच खेळाडूंबाबत अपडेट्स दिले आहेत.
बीसीसीआयने दिलेल्या माहितीनुसार 'जसप्रीत बुमराह आणि प्रसिद्ध कृष्णा या वेगवान गोलंदाजांची रिहॅब प्रक्रिया अखेरच्या टप्प्यात आहे. दोघेही पूर्ण ताकदीने नेट्समध्ये गोलंदाजी करत आहेत.'
'आता काही दिवसात एनसीए सराव सामने आयोजित करेल, ज्यात हे दोघेही खेळतील. बीसीसीआय त्यांच्या सुधारणेबाबत खूश आहे. दोघांच्याबाबतीत अंतिम निर्णय सराव सामन्यांनंतर घेतला जाईल.'
दरम्यान, जर बुमराह आणि प्रसिद्ध कृष्णा यांनी सराव सामन्यातही प्रगती दाखवली, तर आगामी एशिया कप किंवा त्याआधी होणाऱ्या आयर्लंड दौऱ्यातून पुनरागमन करू शकतात.
तसेच बीसीसीआयने श्रेयस अय्यर आणि केएल राहुलबद्दलही माहिती दिली आहे की 'दोघांनी नेट्समध्ये फलंदाजी सरावाला सुरुवात केली आहे. सध्या दोघेही स्ट्रेंथ आणि फिटनेसचे सराव करत आहेत. बीसीसीआयचे वैद्यकिय पथक त्यांच्यातील सुधारणेने समाधानी आहे. ते लवकरच त्यांच्या क्षमता आणि कौशल्यासाठी आणखी जोराने तयारी करतील.'
याशिवाय गेल्यावर्षाअखेरीस झालेल्या कार अपघातात गंभीर जखमी झालेल्या पंतही त्याच्या दुखापतीतून सावरत असून त्याच्या तंदुरुस्तीबद्दलही बीसीसीआयने अपडेट्स दिल्या आहेत.
बीसीसीआयने दिलेल्या माहितीनुसार 'पंतने त्याच्या रिहॅब प्रक्रियेत चांगली प्रगती केली आहे. त्याने नेट्समध्ये फलंदाजी आणि यष्टीरक्षणाचा सराव करण्यास सुरुवात केली आहे. आता तो त्याच्यासाठी तयार करण्यात आलेल्या धावणे, ताकद आणि लवचिकता याबाबतच्या योजनांचे पालन करत आहे.'
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.