बंगळूरची निराशा कायम, जमशेदपूरविरुद्ध गोलशून्य बरोबरीचेच समाधान

पणजी : माजी विजेत्या बंगळूर एफसीची इंडियन सुपर लीग (आयएसएल) फुटबॉल स्पर्धेच्या आठव्या मोसमातील निराशा सोमवारीही कायम राहिली. त्यांनी जमशेदपूर एफसीला गोलशून्य बरोबरीत रोखले, पण दहाव्या क्रमांकावरून सुटका झाली नाही. सामना बांबोळी येथील एथलेटिक स्टेडियमवर झाला. संपूर्ण नव्वद मिनिटांच्या खेळात गोल नोंदविण्यास अपयश आल्यामुळे दोन्ही संघांना प्रत्येकी एक गुण मिळाला. त्यामुळे जमशेदपूरला दुसऱ्या क्रमांकापर्यंत प्रगती साधता आली. त्यांची ही सात लढतीतील तिसरी बरोबरी होती.

12 गुणांसह ते आता दुसऱ्या स्थानी असून अव्वल क्रमांकावरील मुंबई (mumbai) सिटीपेक्षा त्यांचे तीन गुण कमी आहेत. बंगळूरला सलग दुसऱ्या लढतीत बरोबरीवर समाधान मानावे लागले. त्यांची ही आठ लढतीतील तिसरी बरोबरी असून सहा गुण झाले आहेत. बंगळूरच्या (bangalore) दहाव्या क्रमांकात फरक पडलेला नाही.

सामना संपण्यास सहा मिनिटे बाकी असताना बंगळूरला गोल करण्याची संधी होती, पण गोलपट्टीने त्यांचा घात केला व आघाडी हुकली. आशिक कुरूनियान याच्या असिस्टवर बदली खेळाडू सुनील छेत्रीने हेडिंग साधले होते, पण चेंडू एलन कॉस्ता याला आपटून गोलपट्टीस धडकला.