India vs Australia, 2nd T20I Match at Thiruvananthapuram
भारत विरुद्ध ऑस्ट्रेलिया संघात सध्या 5 सामन्यांची टी20 मालिकेतील दुसरा सामना रविवारी (26 नोव्हेंबर) खेळला जात आहे. हा सामना तिरुवनंतपुरमधील ग्रीनफिल्ड आंतरराष्ट्रीय स्टेडियमवर सुरु असून भारताने ऑस्ट्रेलियासमोर 236 धावांचे आव्हान ठेवले आहे.
या सामन्यात ऑस्ट्रेलियाने नाणेफेक जिंकून प्रथम गोलंदाजी करण्याचा निर्णय घेतला होता. मात्र सलामीला एक बाजू उपकर्णधार ऋतुराज गायकवाडने सांभाळलेली असताना दुसऱ्या बाजूने यशस्वी जयस्वालने आक्रमक फटकेबाजी करत अर्धशतक पूर्ण केले.
मात्र त्यानंतर लगेचच तो बाद झाला. त्याने 25 चेंडूत 53 धावांची खेळी केली, ज्यात 9 चौकार आणि 2 षटकारांचा समावेश आहे. तो बाद झाल्यानंतर ईशान किशननेही आक्रमक खेळ केला.
ईशाननेही ऑस्ट्रेलियन गोलंदाजांवर हल्लाबोल करताना अर्धशतक केले. पण तोही अर्धशतकानंतर लगेचच बाद झाला. त्याने 32 चेंडूत 3 चौकार आणि 4 षटकारांसह 52 धावांची खेळी केली.
यानंतरही कर्णधार सूर्यकुमार यादवने हीच लय कायम ठेवली आणि २ खणखणीत षटकार मारले. पण तो त्याची खेळी मोठी करू शकला नाही आणि 10 चेंडूत 19 धावा करून बाद झाला.
या विकेट्स जात असताना एक बाजू सांभाळलेल्या ऋतुराजनेही अर्धशतक पूर्ण केले. त्याने 39 चेंडूत त्याचे अर्धशतक पूर्ण केले.
दरम्यान, त्याच्या अर्धशतकानंतर रिंकू सिंगनेही 19 व्या षटकात तब्बल 25 धावा चोपल्या. त्यामुळे भारताने 200 धावांचा टप्पा सहज पार केला. ऋतुराज अखेरच्या षटकात 43 चेंडूत 3 चौकार आणि 2 षटकारांसह 58 धावा करून बाद झाला.
अखेरीसही तिलक वर्मा 2 चेंडूत एका षटकारासह 7 धावांवर नाबाद राहिला, तर रिंकू सिंग 9 चेंडूत 31 धावांवर नाबाद राहिला. रिंकूने 4 चौकार आणि 2 षटकार मारले. त्यामुळे भारताने 20 षटकात 4 बाद 235 धावा केल्या. ऑस्ट्रेलियाकडून नॅथन एलिसने ३ विकेट्स घेतल्या, तर मार्कस स्टॉयनिसने 1 विकेट घेतली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.