पणजी: नॉर्थईस्ट युनायटेडने आघाडी घेतली आणि लगेच गमावली. त्याचा लाभ उठवत एटीके मोहन बागानने पिछाडीवरून जोरदार मुसंडी मारत 3-1 असा फरकाने विजय नोंदविला आणि आठव्या इंडियन सुपर लीग (आयएसएल) फुटबॉल स्पर्धेत दुसऱ्या स्थानी उडी घेतली. सामना शनिवारी फातोर्डा येथील पंडित जवाहरलाल नेहरू स्टेडियमवर झाला. सामना शनिवारी फातोर्डा येथील पंडित जवाहरलाल नेहरू स्टेडियमवर झाला. (ATK Mohan Bagan)
नॉर्थईस्ट युनायटेडसाठी व्ही. सुहेर याने 17व्या मिनिटास गोल केला. 22व्या मिनिटास एटीके मोहन बागानसाठी फिनलंडचा जॉनी कौको याने बरोबरीचा गोल नोंदविला. नंतर शानदार फॉर्ममध्ये असलेल्या लिस्टन कुलासोने मोसमातील वैयक्तिक सातवा गोल नोंदवत 45व्या मिनिटास एटीके मोहन बागानला 2-1 असे वर्चस्व मिळवून दिले. यंदा आयएसएलमध्ये भारतीयांतर्फे गोमंतकीय आघाडीपटूने सर्वाधिक गोल केले आहेत. नंतर 52व्या मिनिटास मानवीर सिंगने आघाडी आणखीनच बळकट केली. लिस्टनने आज सुरेख खेळ करून वाहव्वा मिळविली. त्याने एक गोल केला, तसेच अन्य दोन्ही गोल त्याच्या असिस्टवर झाले.
सलग 10 सामने अपराजित असलेल्या एटीके मोहन बागानने (Atk Mohan Bagan)14 लढतीत सातवा विजय नोंदविला. त्यांचे आता 26 गुण झाले असून पहिल्या क्रमांकावरील हैदराबाद एफसीपेक्षा तीन गुण कमी आहेत, तर तिसऱ्या क्रमांकावरील जमशेदपूर एफसीपेक्षा एक गुण जास्त आहेत. सलग दहा सामन्यांत एटीके मोहन बागानने पाच विजय व पाच बरोबरीची नोंद केलीय. नॉर्थईस्ट युनायटेडची खराब कामगिरी कायम राहिली. 17 लढतीत त्यांना तब्बल अकरावा पराभव पत्करावा लागला. सर्वाधिक 38 गोल स्वीकारलेल्या या संघाचे 10 गुण आणि शेवटचा अकरावा क्रमांक कायम राहिला.
पिछाडीवरून मुसंडी
नॉर्थईस्टने आघाडीनंतर पुन्हा एकदा पिछाडीवर जाण्याची परंपरा कायम राखली. मार्सेलो परेरा व व्ही. सुहेर यांच्या संयुक्त प्रयत्नामुळे नॉर्थईस्टला आघाडी मिळाली. सुहेरने एटीके मोहन बागानच्या बचावफळीत चकवा दिल्यानंतर सणसणीत प्रेक्षणीय फटक्यावर गोलरक्षक अमरिंदर सिंगचा बचाव भेदला. गुवाहाटीच्या संघाचा आनंद जास्त काळ टिकला नाही. पाच मिनिटानंतर फिनलंडचा विश्वकरंडक खेळाडू जॉनी कौको याच्या गोलमुळे एटीके मोहन बागानला बरोबरी साधता आली. गोलक्षेत्रात लिस्टनकडून मिळालेल्या शानदार पासवर कौको याने प्रतिस्पर्धी गोलरक्षक सुभाशिष रॉय याला अजिबात संधी दिली नाही. त्याचा हा आयएसएल स्पर्धेतील पहिलाच गोल ठरला.
विश्रांतीपूर्वी लिस्टनने मोसमातील वैयक्तिक सातवा गोल नोंदवत एटीके मोहन बागानला 2-1 अशी आघाडी मिळवून दिली. या गोलवेळी कौको याने मध्यक्षेत्रात चेंडूवर ताबा मिळविला. त्याने मुसंडी मारलेल्या लिस्टनकडे चेंडू पास केला. गोमंतकीय आघाडीपटूवर सणसणीत फटक्यावर चेंडूला अचूक दिशा दाखविली. विश्रांतीनंतर सातव्या मिनिटास मानवीर सिंगने सलग दुसरा, तर एकंदरीत मोसमातील तिसरा गोल नोंदवत एटीके मोहन बागानची आघाडी 3-1 अशी भक्कम केली. यावेळेस लिस्टनकडून मिळालेल्या पासवर मानवीरने नॉर्थईस्टच्या बचावपटूस मागे टाकत चमकदार गोल केला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
