Travel Without Visa: प्रवास झाला सोपा! 'या' देशात व्हिसाशिवाय फिरता येणार

Travel Without Visa: ज्या लोकांना प्रवासाची आवड आहे, ते सगळ्यात आधी त्यांचा पासपोर्ट बनवून घेतात कारण जग फिरण्यात वेगळीच मजा आहे. परंतु जर तुम्ही दुसऱ्या देशात जात असाल तर सहसा पासपोर्ट व्यतिरिक्त व्हिसा आवश्यक असतो. त्यामुळे अनेकांना इतर देशांत फिरण्याचा आनंद घेता येत नाही.

पण तुम्हाला माहित आहे का, की तुम्ही भारतीय पासपोर्टवर व्हिसाशिवायही जगातील 50 हून अधिक देशांमध्ये प्रवास करू शकता. या देशांमध्ये तुम्हाला कोणत्याही प्रकारच्या व्हिसाची गरज भासणार नाही.

नुकत्याच प्रसिद्ध झालेल्या हेन्ले पासपोर्ट इंडेक्सनुसार, भारतीय पासपोर्ट धारक व्हिसाशिवाय अनेक देशांमध्ये प्रवेश करू शकतात. या देशांमध्ये अल्बानिया, सर्बिया, बोत्सवाना, इथिओपिया आणि युगांडा या देशांचा समावेश आहे. म्हणजेच या देशांमध्ये जाण्यासाठी तुम्हाला व्हिसासाठी अगोदर अर्ज करण्याची गरज नाही.

याबरोबरच या यादीत मध्य पूर्व देश इराण, जॉर्डन, ओमान आणि कतार हीदेखील नावे आहेत जिथे तुम्ही व्हिसाशिवाय प्रवास करू शकता. आशियाई देशांबद्दल बोलायचे झाले तर कंबोडिया, इंडोनेशिया, श्रीलंका आणि थायलंड यांचाही या यादीत समावेश होतो.

अलीकडेच भूतान आणि नेपाळनेही भारतीय पासपोर्टधारकांना व्हिसा ऑन अरायव्हलऐवजी व्हिसा फ्री प्रवासाची संधी दिली आहे. म्हणजेच तुम्ही या देशांसाठी निघताना व्हिसा इंटरव्ह्यूची गरज भासणार नाही, व्हिसा लाइन आणि कागदपत्रांची गरज भासणार नाही.

याशिवाय कझाकिस्तानचे नावही या देशांच्या यादीत समाविष्ट आहे. तुम्ही या देशात 14 दिवसांसाठी व्हिसाशिवाय प्रवास करू शकता. यासोबतच समुद्रकिनाऱ्यांसाठी प्रसिद्ध असलेल्या बार्बादोज आणि फिजीचाही या यादीत समावेश आहे.

भारतीय सेलिब्रिटी अनेकदा मालदीवमध्ये सुट्टीसाठी जातात. जर तुम्हालाही इथे जायचे असेल तर तुम्ही व्हिसाशिवाय जाऊ शकता. जर तुम्हाला आफ्रिकन देशांमध्ये जायचे असेल तर तुम्ही व्हिसाशिवाय मॉरिशस, सेनेगलला भेट देऊ शकता.