Breast Cancer: स्तन कॅन्सरग्रस्त महिलांना युवराज सिंग फाऊंडेशनचा आधार; काणकोणमध्ये शिबिराचे आयोजन

Breast Cancer: युवराज सिंग फाऊंडेशन संस्थेतर्फे देशभरातील पीडित स्तन कॅन्सरग्रस्त महिलांना आधार मिळत आहे. मेमोग्राफी चाचणीमुळे या रोगाचे प्राथमिक निदान करून घेणे खेडोपाडी सहज साध्य झाले आहे. देशभरातील अनेक महिलांना या फाऊंडेशनचा आधार वाटतो, असे प्रतिपादन डॉ. दीपिका देसाई यांनी केले.

महर्षी अध्यात्म विश्‍वविद्यालयातर्फे देळे, काणकोण येथील निल नाईक गावकर यांच्या निवासस्थानी आयोजिल्या स्तन चाचणी शिबिरात डॉ. देसाई बोलत होत्या. देळे येथील श्री निराकार मठ स्वयंसहाय्य गटाच्या 16 महिलांनी शिबिराचा लाभ घेतला. दिव्या नाईक यांचाही यावेळी सहयोग लाभला.

डॉ. देसाई म्हणाल्या, तत्काळ मेमोग्राफी चाचणी करण्याचे उपकरण या फाऊंडेशनतर्फे पुरवण्यात आल्यामुळे आज खेड्यापाड्यातील स्तन कॅन्सरग्रस्त महिलांनाही चाचणी करून घेणे सहज साध्य झाले आहे. प्रत्येक महिलेने कोणताही विचार न करता ही चाचणी करून घेणे आवश्यक आहे.

महर्षी अध्यात्म विश्‍वविद्यालयाच्या ज्योती पैंगीणकर व मेघना गावकर यांनीही यावेळी महत्त्वपूर्ण माहिती दिली. स्वयंसहाय्य गटाच्या आरती नाईक गावकर यांनी आभार मानले.