Yoga Day 2025: आता गोव्याच्या शाळांमध्येही 'योग' अनिवार्य! फोटो आणि अहवाल सादर करण्याचे निर्देश

पणजी: आंतरराष्ट्रीय योग दिनाच्या (२१ जून) पार्श्वभूमीवर, गोवा शिक्षण संचालनालयाने राज्यातील सर्व शाळांना महत्त्वाचे निर्देश दिले आहेत. नवीन शैक्षणिक वर्षासाठी ४ जूनपासून वर्ग सुरू होताच, विद्यार्थ्यांना दररोज योगाभ्यास सत्रांना सुरुवात करण्याचे आवाहन करण्यात आले आहे. हा निर्णय सरकारी, सरकारी अनुदानित, विनाअनुदानित प्राथमिक, माध्यमिक, उच्च माध्यमिक आणि विशेष शाळांसाठी लागू केला जाईल.

शिक्षण संचालक शैलेश झिंगडे यांनी काढलेल्या परिपत्रकानुसार, शाळांना नियमित शैक्षणिक सत्र सुरू होण्यापूर्वी दररोज सकाळी किमान अर्धा तास योगाभ्यास करणे बंधनकारक आहे.

झिंगडे म्हणाले, "हा योगाभ्यास २१ जूनपर्यंत सुरू राहील आणि शाळेच्या निर्णयानुसार तो पुढेही वाढवता येऊ शकतो."

या सत्रांदरम्यान, सोपी आणि विद्यार्थ्यांच्या वयाला योग्य अशी आसने, श्वासोच्छ्वास व्यायाम आणि ध्यान तंत्रांवर भर दिला जाईल, असेही झिंगडे यांनी स्पष्ट केले. यामुळे विद्यार्थ्यांमध्ये लहानपणापासूनच योगाची सवय रुजण्यास मदत होईल आणि त्यांना शारीरिक व मानसिकदृष्ट्या निरोगी राहण्यास प्रोत्साहन मिळेल.

योग दिनानिमित्त विशेष सत्रांचे आयोजन

२१ जून रोजी आंतरराष्ट्रीय योग दिन साजरा करण्यासाठी शाळांना विशेष योग सत्रांचे आयोजन करण्याचेही निर्देश देण्यात आले आहेत. या सत्रांचे फोटो आणि एक संक्षिप्त अहवाल २५ जूनपर्यंत शिक्षण संचालनालयाकडे सादर करणे बंधनकारक असेल. या निर्णयामुळे गोव्यात योगाचे महत्त्व वाढणार असून, विद्यार्थ्यांच्या सर्वांगीण विकासाला चालना मिळेल, अशी अपेक्षा व्यक्त केली जात आहे.