स्वावलंबी बनण्‍यासाठी महिलांनी सरकारी योजनांचा लाभ घ्यावा: विश्वजीत राणे

पर्ये: सरकारच्‍या विविध योजना आता सुटसुटीत झाल्‍या असून स्वावलंबी बनण्‍यासाठी महिलांनी त्‍यांचा लाभ घ्‍यावा. या योजनांमध्ये काही त्रुटी होत्या, त्या दूर करण्‍यात आल्‍या आहेत. स्वयंसाहाय्य गटांनाही त्‍याचा फायदा होणार आहे. महिला आणि बालकल्याण खाते आता वरच्या स्तरावर पोचले असून आणखीही काही योजना विचाराधीन आहेत, असे प्रतिपादन महिला आणि बालकल्याण खात्याचे मंत्री विश्वजीत राणे (Vishwajeet Rane) यांनी केले. पर्ये-सत्तरी येथे काल रविवारी संध्याकाळी उशिरा झालेल्या महिला मेळाव्‍यात राणे बोलत होते.

या मेळाव्‍याला पर्ये मतदारसंघातील सहा पंचायत क्षेत्रांमधून सुमारे तीन हजार महिला उपस्थित होत्‍या. व्‍यासपीठावर भाजप प्रदेशाध्यक्ष सदानंद शेट तानावडे, महिला आणि बालकल्याण खात्याच्या संचालक दीपाली नाईक, उपसंचालक ज्योती देसाई, वाळपई बाल सर्वांगीण विकास योजना प्रकल्प अधिकारी छाया कडकडे, केरीचे सरपंच दाऊद सय्यद, मोर्लेच्‍या विद्या कासार, पर्येचे सका सावंत, होंड्याचे आत्माराम गावकर, पिसुर्लेच्‍या जयश्री परब, उपसरपंच आणि मान्‍यवरांची उपस्थिती होती. दरम्‍यान, या मेळाव्यात खात्याअंतर्गत स्वावलंबन योजना धनादेश मंजुरीपत्रे स्वयंसाहाय्य गटांना प्रदान केली.

विश्‍‍वजीत राणेंवर तानावडेंची स्‍तुतिसुमने!

सदानंद शेट तानावडे (Sadanand Tanawade) यांनी मंत्री विश्‍‍वजीत राणे यांच्या कार्याचा गौरव केला. त्‍यांनी आपल्‍या खात्यांची जबाबदारी चांगल्या प्रकारे सांभाळली असून, कोविड काळात त्यांचे मोठे योगदान लाभल्‍याचे सांगितले. तसेच त्यांनी उपस्थित महिलांना मार्गदर्शन केले.