नवऱ्याच्या हातात हात घालून "ती" करतेय वाद्ये दुरुस्ती

डिचोली: शिक्षणासह कला, क्रीडा आदी प्रत्येक क्षेत्रात आज महिला पुढे येत आहेत. त्याची अनेक उदाहरणे समाजासमोर आहेत. घरसंसाराचा प्रपंच सांभाळताना अनेक महिला आपल्या जोडीदाराच्या हातात हात घालून कार्यरत आहेत.या गोष्टीचा प्रत्यय सध्या डिचोली शहरात येत आहे. एक महिला चक्क आपल्या नवऱ्यासोबत चर्मवाद्ये दुरुस्ती करतानाचे बाजारात दिसून येत आहे.

चतुर्थीनिमित्त महाराष्ट्रातील पंढरपूर येथील सुनील बळवंत धुमाळ हे पारंपरिक चर्मवाद्ये दुरुस्ती कारागीर यंदाही डिचोली शहरात आले आले आहेत. जुन्या बाजारात घुमट, समेळ, तबला, पखवाज आदी चर्मवाद्ये दुरुस्ती करण्यात व्यस्त आहेत. आश्चर्याची बाब म्हणजे सुनील यांच्या पत्नी मंदा याही आपल्या नवऱ्यासोबत वाद्ये दुरुस्ती करताना दिसून येत आहे. एखाद्या कसलेल्या कारगिराप्रमाणे मंदा या वाद्ये दुरुस्ती करीत आहेत.

चतुर्थी जवळ आली, की वडिलोपार्जित वाद्ये दुरुस्ती कला सांभाळून असलेले सुनील धुमाळ हे कारागीर जवळपास 50 वर्षांपासून गोव्यात येत आहेत. सुरवातीस म्हणजेच अकरा वर्षांचे असताना सुनील आपल्या वडील भावासमवेत येत होते. आता त्यांनी स्वतंत्र व्यवसाय सुरु केला असून, दरवर्षी चतुर्थीला दीड-दोन महिने असताना ते डिचोलीत येत आहे. सुनील यांना यांना या व्यवसायात त्यांच्या पत्नी मंदा यांची साथ मिळत आहे. गेल्या अठरा वर्षांपासून मंदा या आपल्या पतीसोबत गोव्यात येत आहेत. मंदा या वाद्य दुरुस्ती करण्यात पूर्णपणे पारंगत झाल्या आहेत. चर्मवाद्ये सहजपणे दुरुस्त करताना मंदा या डग्गा, तबला, पखवाज यांना शाई घालण्यातही पूर्ण पारंगत आहेत. या व्यवसायात आपल्याला आपल्या पत्नीची मोठी साथ मिळत आहे. 'कोविड' मुळे गेल्यावर्षी गोव्यात येणे शक्य झाले नाही. यापुर्वीची तुलनेत यंदा वाद्ये दुरुस्तीसाठी गणेशभक्तांकडून अपेक्षित प्रतिसाद मिळालेला नाही. तरीदेखील विघ्नहर्त्या गणरायाचे कृपेने जे काय मिळते, त्याच्यावर आपण समाधानी आहे. असे सुनील धुमाळ म्हणतात.

"माहेरी वाद्ये दुरुस्ती कलेचा वारसा नाही, की या कलेचे आपण शिक्षण घेतलेले नाही. लग्न झाले आणि सासरी आल्यानंतर चूल आणि मुलांना सांभाळतानाच वेळ मिळेल तशी नवऱ्याला मदत करू लागले. हळूहळू आवड निर्माण झाली आणि ही कला अंगात कधी भिनली ते कळलेच नाही. आता कोणतेही चर्मवाद्य समोर आले, की त्याची दुरुस्ती अवघड वाटत नाही. वाद्य दुरुस्ती करतानाच गावी भरणाऱ्या जत्रेवेळी आपण नारळ विक्रीचाही धंदा करते."

-सौ. मंदा सुनील धुमाळ, पंढरपूर.