सुर्ल येथील ‘सिंहाचो बांध’ बंधाऱ्यात युवक बुडाला

बंधाऱ्यातील पाण्यात बुडाल्याने 42 वर्षीय युवकाचा मृत्यू झाला. ही घटना मंगळवारी सायंकाळी घाडीवाडा-सुर्ल येथील ‘सिंहाचो बांध’ या बंधाऱ्यात घडली. प्रताप वसंत आमोणकर असे मृताचे नाव आहे. तो भिलेवाडा-सुर्ल येथील होता.

मंगळवारी सायंकाळी प्रताप अन्य तीन मित्रांसमवेत बंधाऱ्यावर आंघोळ करण्यासाठी गेला होता. आंघोळ करताना त्याचा तोल गेला आणि तो पाण्यात बुडाला. सोबत असलेल्या मित्रांनी त्याला पाण्याबाहेर काढून उपचारार्थ इस्पितळात नेले.

मात्र, डॉक्टरांनी त्याला मृत घोषित केले. बांबोळी येथील गोमेकॉ रुग्णालयात शवचिकित्सा केल्यानंतर आज प्रताप याचा मृतदेह नातेवाईकाच्या ताब्यात देण्यात आला. प्रताप याच्या पार्थिवावर स्थानिक स्मशानभूमीत अंत्यसंस्कार करण्यात आले.