मटका म्हणजे काय? पुराव्यांअभावी मडगाव कोर्टाकडून संशयिताची निर्दोष सुटका

मडगाव: मटका प्रकरणात एका व्यक्तीची मडगाव प्रथमवर्ग न्यायालयाने निर्दोष सुटका केली आहे. पुरेसे पुरावे सादर न केल्याने तसेच, मटका या शब्दाची व्याख्या व्यवस्थित स्पष्ट न करता आल्याने त्याची सुटका करण्यात आली.

मडगाव पोलिसांनी जुने स्थानक रस्ता परिसरात मटका विक्री करणाऱ्या व्यक्तीला अटक करुन त्याच्याविरोधात जुगार आणि गॅम्बलिंग प्रकरणी गुन्हा नोंद करण्यात आला होता. त्याच्याकडून जुगाराशी निगडीत साहित्यही जप्त करण्यात आले होते.

दरम्यान, पोलसांनी येथे जुगार खेळताना कोणाला अटक केली नाही. स्वतंत्र प्रत्यक्षदर्शीची चौकशी करण्यात आली नाही. तसेच, मटका या शब्दाची व्यवस्थित व्याख्या स्पष्ट करण्यात आली नाही, असे निरीक्षण कोर्टाने नोंदवले आहे.

एखादा व्यक्ती त्याठिकाणी उपस्थित होता यावरुन त्याला दोषी ठरवता येणार नाही, असे निरीक्षण कोर्टाने नोंदवत संशयिताची सुटका करण्याचे आदेश दिले.