Pipeline Burst : जलवाहिनी फुटल्याने ‘भाटले’ जलमय

Pipeline Burst : सांडपाण्याची वाहिनी घालण्याचे काम करताना भाटले येथील जलवाहिनी फुटल्याने परिसरात सगळीकडे पाणी पसरले. पाण्‍याचा जोर मोठा असल्याने नागरिकांच्या घरात पाणी शिरून त्यांची तारंबळ उडाली. जलवाहिनी फुटलल्याने ताळगाव आणि सांतआंद्रेतील काही भागांमध्ये पुरवठा काहीकाळ खंडित होणार असल्याची माहिती सार्वजनिक बांधकाम खात्याने दिली आहे.

बऱ्याच दिवसांपासून या परिसरात सांडपाणी वाहिनी घालण्यासाठी खोदकाम सुरू आहे. त्यात बुधवारी सायंकाळी 5.30 वा. ते 6 वा. सुमारास 600 एमएमची पीआय जलवाहिनी फुटल्याने पाणी परिसरात शिरले. काही घरांतही पाणी घुसले होते. नागरिकांची प्रचंड गैरसोय झाली. त्यात सायंकाळची वेळ असल्याने वाहतूकदारांना देखील याचा त्रास झाला.

जलवाहिनी फुटल्याने आम्ही तातडीने दुरुस्तीचे काम हाती घेतले असून युद्ध पातळीवर ते पूर्ण केले जाईल. या ठिकाणी भूमिगत वीज वाहिनी आणि इतर काही केबल असल्याने काळजीपूर्वक काम करावे लागतील, असं अधिकाऱ्यांनी सांगितलं.

फर्निचरही पाण्यात

जलवाहिनी फुटल्याने घरात अचानक पाणी शिरल्याने तिवरे यांच्या कुटुंबांची मोठी धावपळ उडाली. घरातील पाणी बाहेर काढताना त्यांना नाकीनऊ झाले होते. पाण्यात फर्निचर, चार्जर्स, लॅपटॉप व इतर साहित्य बुडाल्याने त्यांचे नुकसानही झाले.

कंत्राटदाराला भुर्दंड

आज गुरुवारी नवीन जलवाहिनी घालण्याचे काम पूर्ण होणार आहे. त्यानंतर सायंकाळी ताळगाव आणि सांतआंद्रेतील भागांमध्ये पाणी पुरवठा पूर्ववत होणार आहे. जलवाहिनी फोडल्याबद्दल कंत्राटदाराकडून खर्च वसूल करून घ्यायचा की नाही ही प्रक्रिया सुरू केली आहे, अशी माहिती जल विभागाचे कार्यकारी अभियंता निवृत्ती पार्सेकर यांनी दिली.

परिसरात चिंता

अचानक जलवाहिनी फुटल्याने पाण्याच्या पुरवठ्यावर परिणाम होणार आहे. त्यामुळे ज्यांच्याकडे पाण्याचा साठा नाही, अशा नागरिकांकडून मात्र चिंता व्यक्त झाली. उद्या पाणी मिळणार नाही, अशी बातमी पसरताचा काही नागरिकांनी धावपळ सुरु केली होती.