Goa Environment: जल, जमीन, जंगल वाचलेच पाहिजे; ज्येष्ठ पर्यावरणप्रेमी निर्मला सावंत

Goa Environment: गोव्‍याच्‍या भावी पिढीसाठी जल, जमीन आणि जंगल वाचले पाहिजे तरच गोवा वाचेल. राज्य आणि केंद्र सरकारच्या विविध धोरणांमुळे पाण्‍याचा, जमिनींचा मोठ्या प्रमाणात ऱ्हास होत आहे. त्‍यामुळेच राज्यातील सर्व आंदोलक ‘ग्रीन गोवा’ या एका छताखाली येत आहेत.

लवकरच आंदोलनाची दिशा जाहीर केली जाईल, अशी माहिती ज्येष्ठ पर्यावरणप्रेमी तथा आंदोलक निर्मला सावंत यांनी आज दिली.

राज्यातील विविध संघटना आणि सिव्‍हिल सोसायटी यांच्या वतीने आयोजित केलेल्या पत्रकार परिषदेत सावंत बोलत होत्या. यावेळी प्रा. प्रज्वल साखरदांडे, तनोज अडवलपालकर, प्रतिमा कुतिन्हो, एलिना साल्‍ढाणा व अन्य सामाजिक कार्यकर्ते उपस्थित होते.

सावंत म्हणाल्या, सरकारच्या वतीने कृषी धोरण बनविण्याचे काम सुरू आहे. यासाठी सामाजिक कार्यकर्ते म्हणून आम्ही काही हरकती आणि सूचना केल्या आहेत. त्यांचा या धोरणात अंतर्भाव व्हावा अशी अपेक्षा आहे. सरकारने शेतकऱ्यांच्या हिताचे कृषी धोरण बनवावे.