Heavy Rain In Goa: फोंडा बसस्थानक भागामध्ये पाणी

Heavy Rain In Goa: फोंड्यात बुधवारी सकाळी पडलेल्या अवकाळी पावसाने फोंड्यातील जुने बसस्थानक पाण्याखाली गेले. अचानक बरसलेल्या पावसाने सर्वांची धावपळ उडाली. पहाटे विजेच्या गडगडाटासह जोरदार पावसाच्या सरी बरसल्या. त्यामुळे सगळीकडे पाणीच पाणी झाले होते.

फोंडा पालिका क्षेत्रातील गटारे पाण्याने भरल्याने रस्त्यावरून पाणी वाहू लागले. पहाटे वीजपुरवठा खंडित झाला होता, मागाहून तो सुरळीत करण्यात आला. बेतोडा-निरंकाल येथे भले मोठे झाड रस्त्यावर कोसळल्याने वाहतूक ठप्प झाली.

मंगळवारी मध्यरात्री पावसाला सुरवात झाली तर बुधवारी पहाटे मोठ्या सरी कोसळल्या. सकाळी कामानिमित्त जाणाऱ्या लोकांची धांदल उडाली. फोंडा बसस्थानक परिसरात पावसाचे पाणी साचल्याने बसस्थानकावरील दुचाक्या अर्ध्या पाण्यात बुडाल्या होत्या. मागाहून पाऊस ओसरल्यानंतर पाणी कमी झाले.