Mopa Taxi Counter : मोपा आंतरराष्ट्रीय विमानतळावर पेडणेतील टॅक्सीधारकांना काउंटर देण्यात यावा, या मागणीसाठी ग्रीन फिल्ड मोपा टॅक्सी असोसिएशनच्या नेतृत्वाखाली मंगळवारी (ता.14) सकाळी सुरू केलेले धरणे आंदोलन बुधवार (ता.15)पर्यंत स्थगित करण्यात आले. 15 रोजी सायंकाळी पेडणे उपजिल्हाधिकाऱ्यांच्या कार्यालयात वाहतूक खात्याच्या अधिकाऱ्यांसोबत काउंटरसंबंधित सविस्तर माहिती समजून घेतल्यावर पुढील निर्णय घेण्यात येणार आहे.
मंगळवारी सकाळी श्री भगवती देवीचे दर्शन व आशीर्वाद घेऊन आंदोलकांनी भास्कर नारुलकर यांच्या नेतृत्वाखाली मोर्चा काढला. बाजारातून वळसा घेत कदंब बसस्थानकाकडून हा मोर्चा पेडणे सरकारी संकुलासमोर आला व त्याचे रूपांतर धरणे आंदोलनात झाले. यावेळी आंदोलकांनी ‘आमच्यो मागण्यो मान्य करात, नही चलेगी, नही चलेगी, दादागिरी नही चलेगी’सारख्या घोषणा दिल्या. त्यांच्या हातात ‘आमकां भिक नाका, हक्क जाय, हक्कासाठी आमचा लढा,’ असे फलक होते.
पेडणे पोलिस ठाण्याचे निरीक्षक दत्ताराम राऊत व मोपा पोलिस ठाण्याचे निरीक्षक निनाद देऊलकर यांच्या मार्गदर्शनाखाली सगळीकडे कडक बंदोबस्त ठेवण्यात आला होता. अधिक पोलिस कुमकही आणण्यात आली होती.
सामंजस्याने विषय सोडवूया
पणजी येथे वाहतूक संचालक, सचिव, पर्यटन खाते सचिव, पेडणे वाहतूक कार्यालय अधिकारी व समितीचे सदस्य यांची संयुक्त बैठक झाली. त्यात टॅक्सी काउंटरसंबंधी बैठक होऊन मोपा विमानतळावर ब्ल्यू टॅक्सी सेवा सुरू करण्याचा निर्णय झाला. पेडणे वाहतूक कार्यालयात 150 अर्ज आले आहेत. त्यांना प्राधान्य देण्याचे ठरले. सायंकाळी उशिरा उपजिल्हाधिकारी दीपक वायंगणकर यांनी आंदोलकांची भेट घेऊन सरकारला आंदोलनकर्त्यांसंबधी सहानुभूती असून हा विषय सामंजस्याने सोडवूया, असे सांगितले.
बुधवार, 15 रोजी सायंकाळी पेडणे उपजिल्हाधिकारी कार्यालयात वाहतूक खात्याच्या अधिकाऱ्यांसोबत आंदोलकांची चर्चा होणार असून नंतरच आंदोलनाची दिशा ठरविण्यात येइल. तोपर्यंत आंदोलन स्थगित ठेवण्यात येईल.
- भास्कर नारुलकर, आंदोलकांचे नेते
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
