तुये-मुरमुसेवासीयांचा इशारा: पाणी द्या, अन्‍यथा मोर्चा

मोरजी: तुये-मुरमुसे इस्‍पितळ परिसरातील सुमारे 90 घरांना मागच्या दोन महिन्यांपासून अनियमित पाणीपुरवठा होत आहे. ही समस्‍या त्‍वरित सुटली नाही तर पाणी विभागावर घागरमोर्चा नेण्याचा इशारा स्थानिक पंचसदस्य आनंद साळगावकर यांच्यासह ग्रामस्‍थांनी दिला आहे.

आम्हाला दिवसाकाठी किमान तीन तास तरी नियमित व सुरळीत पाणीपुरवठा व्‍हायला पाहिजे. चांदेल जलप्रकल्पातून दरदिवशी पेडणे तालुक्‍याला पंधरा एमएलडी पाणी सोडले जाते. पण ते खूपच अपुरे पडू लागले आहे. कारण तालुक्‍यात एकूण २० ग्रामपंचायती आणि एका नगरपालिका क्षेत्राचा समावेश आहे. लोकसंख्याही वाढलेली आहे. त्याचप्रमाणे लहान-मोठे उद्योग, व्यवसाय आलेले आहेत. साहजिकच पाण्याची मागणी वाढली आहे. दुसरीकडे चांदेल प्रकल्पाचा विस्तारही योग्य पद्धतीने होत नसल्याने ही समस्या दिवसेंदिवस तीव्र होऊ लागली आहे.

पेडणे तालुक्यात नियोजित प्रकल्‍पांचे काम सध्‍या मोठ्या प्रमाणावर सुरू आहे. त्यांनाही पाणीपुरवठा करण्यास सरकार बांधील आहे. त्यामुळे सरकार चांदेल प्रकल्पाचे पाणी इतरत्र वळवते की काय अशी भीती नागरिकांना सतावत आहे. तुये पंचायत क्षेत्रातील मुरमुसे या गावात सध्या पाण्याची तीव्र समस्या जाणवत आहे. मागच्या सहा महिन्यांपूर्वी संबंधित खात्याच्‍या सर्व अधिकाऱ्यांची ग्रामस्‍थांसमवेत संयुक्त बैठक झाली. त्यावेळी पाण्याचा विषय ऐरणीवर आला होता. पण अजूनपर्यंत पाणीपुरवठा सुरळीत झालेला नाही.