Goa Voter List Update: मतदारयादी सुधारणेसाठी गोव्यात विशेष मोहीम! मतदान केंद्रावर कोणकोणती कामे होणार जाणून घ्या

State Plans Special Drive to Improve Voter Registration

पणजी: राज्यातील मतदारयादीत सुधारणा करण्यासाठी राज्य मुख्य मतदार अधिकारी कार्यालयाने विशेष मोहीम राबवण्याचे ठरवले आहे. या कालावधीत पत्त्यांत सुधारणा, यादीतील नावे कमी करणे, पत्त्यांत बदल, नवीन नावांचा समावेश करणे आदी कामे मतदान केंद्र पातळीवर केली जाणार असल्याची माहिती संयुक्त मुख्य मतदार अधिकारी सुनील मसुरकर यांनी दिली.

त्यांनी दिलेल्या माहितीनुसार, २० ऑगस्ट ते १८ ऑक्टोबरपर्यंत या यादीतील त्रुटी दूर करण्याचे काम कार्यालयीन पातळीवर करण्यात आले आहे. यादीचा कच्चा मसुदा आता तयार करण्यात आला आहे. तो प्रसिद्ध केला जाणार आहे. त्यानंतर या यादीतून कोणाची नावे गळाली असतील तर ती समाविष्ट करण्यासाठी, यादीतून मृत व्यक्तीची नावे काढण्यासाठी तसेच नवमतदारांची नावे समाविष्ट करण्यासाठी मतदान केंद्र पातळीवर मोहीम राबवण्यात येणार आहे.

गोवा

२९ ऑक्टोबर ते २८ नोव्हेंबरदरम्यान असे दावे सादर करता येणार आहेत. २४ डिसेंबरपर्यंत अशा दाव्यांवर निर्णय घेतला जाणार आहे. त्यानंतर ६ जानेवारी रोजी अंतिम मतदार यादी प्रसिद्ध केली जाणार आहे.