Mahadayi Water Dispute: एक दिवा म्हादईसाठी! सरकारच्या डोक्यात प्रकाश पडो - सरदेसाईंची कोपरखळी

Mahadayi Water Dispute: आपल्या खुर्चीसाठी म्हादईचा कर्नाटकशी सौदा करणारे आणि कर्नाटक राज्यात जाऊन तिथे त्या सरकारला निवडा असे आवाहन करणारे मुख्यमंत्री प्रमोद सावंत आणि त्यांचे सरकार गोवा विरोधी असून हे सरकार कायमचे घरी पाठवण्यासाठी सर्व गोमंतकीयानी एकत्र यावे अशी हाक गोवा फॉरवर्डचे अध्यक्ष विजय सरदेसाई यांनी आज दिली.

रविवारी त्यांनी आपली पत्नी उषा सरदेसाई यांच्यासह गोयकार घरासमोर म्हादईच्या रक्षणासाठी पणत्या लावल्या. "उद्या म्हादई संदर्भात सर्वोच्च न्यायालयात सुनावणी होणार आहे. त्यात गोव्याची बाजू समर्थपणे मांडली जाणार आहे."

"मात्र, ज्या राजकारण्यांनी म्हादई विक्रीला काढली त्यांच्या डोक्यात काही प्रकाश पडो यासाठीच या पणत्या आणि मेणबत्त्या लावल्या जात आहेत" असे सरदेसाई यांनी सांगितले.

आज सासष्टी तालुक्यातही बऱ्याच घरांसमोर मेणबत्त्या लावल्या गेल्या. ही फक्त सुरुवात आहे. हे आंदोलन अधिकच तीव्र केले जाईल असे सरदेसाई यांनी सांगितले.

आपच्या नेत्या प्रतिमा कुतीन्हो यांनी पणजी येथे मांडवी किनारी येऊन मेणबत्ती पेटवली. या सरकारने मांडवीचा सौदा करताना सर्व गोवेकरांना काळोखात ठेवले. म्हादईचा घात करणाऱ्यांच्या डोक्यात उजेड पडावा यासाठी हे आंदोलन करण्यात येत आहे असे कुतीन्हो म्हणाल्या.