Goa Politics: "मी भाजपमध्ये जाणार, ही केवळ वावडी", अफवा पसरवणाऱ्यांची तोंडं सरदेसाईंनी केली बंद VIDEO

पणजी: राज्याच्या राजकारणात गोवा फॉरवर्ड पार्टीचे सर्वेसर्वा आणि फातोर्डाचे आमदार विजय सरदेसाई यांच्या भाजप प्रवेशाच्या चर्चेने पुन्हा एकदा उचल खाल्ली आहे. मात्र, या सर्व चर्चांना पूर्णविराम देत सरदेसाई यांनी अत्यंत स्पष्ट शब्दांत आपली भूमिका मांडली. त्यांचा एक व्हिडिओ सध्या सोशल मीडियावर तुफान व्हायरल होत असून त्यात त्यांनी आपल्या भाजप प्रवेशाच्या बातम्यांना केवळ 'अफवा' असल्याचे म्हटले.

गेल्या काही दिवसांपासून राजकीय वर्तुळात आणि सोशल मीडिया प्लॅटफॉर्मवर विजय सरदेसाई भाजपमध्ये सामील होणार असल्याच्या चर्चांणा उधान आले होते. या पार्श्वभूमीवर पत्रकारांशी संवाद साधताना विजय सरदेसाई यांनी या चर्चांचा समाचार घेतला. व्हायरल व्हिडिओमध्ये सरदेसाई मिश्किलपणे पण ठामपणे म्हणतात, "माझ्या भाजपमध्ये (BJP) जाण्याबद्दल नेहमीच अफवा पसरवल्या जातात. हा एक न थांबणारा सिलसिला झाला आहे." त्यांनी स्पष्ट केले की, अशा अफवा मुद्दामून पसरवल्या जातात जेणेकरुन लोकांमध्ये संभ्रम निर्माण होईल.

विरोधकांची खेळी की केवळ अफवा?

विजय सरदेसाई हे सध्या गोव्यातील (Goa) भाजप सरकारवर टीका करण्यात सर्वात आघाडीवर असणारे नेते आहेत. भ्रष्टाचार, पर्यावरण आणि स्थानिक प्रश्नांवरुन ते सातत्याने सरकारला धारेवर धरत असतात. अशा परिस्थितीत त्यांच्या भाजप प्रवेशाच्या बातम्या येणे, हे अनेकांसाठी धक्कादायक होते. सरदेसाई यांच्या मते, त्यांच्या राजकीय प्रतिमेला तडा घालण्यासाठी किंवा त्यांच्या समर्थकांमध्ये भीती निर्माण करण्यासाठी हे विरोधकांचे कारस्थान असू शकते.

"मी गोव्याच्या हितासाठी ठाम"

सरदेसाई यांनी आपल्या व्हिडिओमध्ये पुढे म्हटले की, गोवा फॉरवर्ड पार्टी गोव्याच्या अस्मितेसाठी आणि गोमंतकीयांच्या हक्कासाठी लढत आहे. सत्तेसाठी विचारधारेशी तडजोड करण्याचा आपला कोणताही विचार नाही. "मी जिथे आहे तिथेच आनंदी आहे आणि गोव्याच्या जनतेचा आवाज बनून काम करत राहणार," असेही त्यांनी स्पष्ट केले.

या स्पष्टीकरणामुळे गेल्या काही दिवसांपासून सुरु असलेल्या राजकीय तर्कवितर्कांना तूर्तास पूर्णविराम मिळाला असला, तरी गोव्याच्या राजकारणात 'कधी काय होईल' याचा नेम नसतो, असे मत राजकीय विश्लेषक व्यक्त करत आहेत.