Goa Police: दक्ष पोलिसांमुळे कैद्याचा पलायनाचा डाव फसला

Goa Police कारागृहातून पलायनाच्या तयारीत असलेल्या एका कैद्याला तेथील सतर्क पोलिसांनी पकडले. हा कैदी मानसिकदृष्ट्या अस्वस्थ असल्याने त्याला बांबोळी येथे मानसोपचार इस्पितळात दाखल केले आहे.

प्राप्त माहितीनुसार, प्रदीप खर्को असे या कैद्याचे नाव आहे. ही घटना बुधवारी (ता.7) दुपारी 3.10 च्या सुमारास घडली. या कैद्याला कारागृहातील पहिल्या मजल्यावर ठेवले होते. यावेळी अंतर्गत भिंत ओलांडून त्याने उडी मारली.

हा प्रकार कारागृहाच्या वॉच टॉवरवरील पोलिसांनी पाहिला आणि त्यांनी कारागृहाच्या इतर तुरुंग रक्षकांना सतर्क केले. पोलिसांनी तो कारागृहाच्या संरक्षक भिंतीवर चढून उडी मारण्याच्या तयारीत असतानाच त्याला पकडले.

उडी मारतेवेळी त्याच्या गुडघ्याला किरकोळ जखम झाली. तुरुंग रक्षकांची कारागृहातील वर्दळ कमी झालेली पाहून त्याने पलायनाचा बेत आखला. हा कैदी मानसिकदृष्ट्या अस्वस्थ असल्याने त्याला मानसोपचार आणि मानवी वर्तन संस्थेमध्ये उपचारासाठी दाखल केले.