CP Radhakrishnan Goa Visit: उपराष्ट्रपती सी. पी. राधाकृष्णन आज गोव्‍यात, घटक राज्यदिन सोहळ्‍याला शनिवारी लावणार उपस्‍थिती

पणजी: यंदाच्या गोवा घटक राज्यदिन सोहळ्याचे प्रमुख पाहुणे उपराष्ट्रपती सी. पी. राधाकृष्णन हे उद्या शुक्रवारी सायंकाळी कर्नाटकातून हवाईमार्गे गोव्यात पोचतील. त्यांचा मुक्काम लोकभवनावर असेल. शनिवारी संध्‍याकाळी ते गोव्यातून परत जातील.

उपराष्ट्रपती उद्या बंगळूरू येथे आर्ट ऑफ लिव्‍हिंग फाऊंडेशन संस्थेच्या स्थापनेला ४५ वर्षे पूर्ण झाल्यानिमित्त आयोजित जागतिक उत्सवात सहभागी होणार आहेत. त्यानंतर ते कर्नाटकमधील दावणगिरी येथे बीडीटी विद्यापीठाच्या अभियांत्रिकी महाविद्यालयाच्या अमृतमहोत्सवी वर्धापनदिन कार्यक्रमाला उपस्थित राहतील. तेथून संध्‍याकाळी ते खास विमानाने दाबोळी विमानतळावर येतील.

कला अकादमी संकुलात ३० मे रोजी सकाळी १० वाजता होणाऱ्या घटक राज्यदिन सोहळ्यास उपराष्ट्रपती प्रमुख पाहुणे म्हणून उपस्थित राहतील. दुपारी ते दोनापावल येथील राष्ट्रीय समुद्र विज्ञान संस्थेला भेट देणार आहेत. सायंकाळी ते कर्नाटककडे हवाईमार्गे प्रयाण करतील.

३१ मे रोजी उपराष्ट्रपती कर्नाटकमधील धर्मस्थळ येथील मंजुनाथ स्वामी मंदिरात दर्शन घेतील. त्यानंतर ते बेल्थंगडी येथे ‘सिरी इंडस्ट्रियल पार्क’चे उद्‌घाटन करणार आहेत. त्याच दिवशी ते केरळ दौऱ्यावर रवाना होणार आहेत.

वाहतुकीवर असतील निर्बंध

उपराष्ट्रपतींच्या दौऱ्यानिमित्त उद्या शुक्रवारी (ता. २९) संध्‍याकाळी ४ ते सायंकाळी ७ या वेळेत दाबोळी विमानतळ, चिखली, कुठ्ठाळी, नवा झुआरी पूल, बांबोळी, दोनापावला यादरम्यानच्या वाहतुकीवर निर्बंध असतील. दुसऱ्या दिवशी ३० रोजी दुपारी २.३० ते सायंकाळी ५.३० यादरम्यानही हा मार्ग सर्वसामान्यांसाठी खुला असणार नाही.