नाट्यगायक रामदास कामत निवर्तले

पणजी : ख्यातनाम नाट्यगायक, अभिनेता रामदास कामत (Ramdas Kamat) यांचे मुंबईत रात्री वृद्धापकाळाने निधन झाले. 18 फेब्रुवारी रोजी ते 91 व्या वर्षात पदार्पण करणार होते. ‘मत्सगंधा’मधील त्यांची भूमिका विलक्षण गाजली होती. या नाटकाने संगीत रंगभूमीला पुनर्वैभव प्राप्त करून दिले. अखिल भारतीय नाट्य संमेलनाचे ते अध्यक्ष होते. कामत यांनी 18 नाटकांमध्ये काम केले. त्यांच्या निधनामुळे गोमंतकीयांनी शोक व्यक्त केला आहे.

विलेपार्ले येथील निवासस्थानी त्यांचे वृद्धापकाळाने निधन झाले. त्यांच्या पश्चात मुलगा डॉक्टर कौस्तुभ कामत, सून डॉ संध्या कामत आणि नातू अनिकेत आणि नातसून असा मोठा परिवार आहे. त्यांचा अंत्यविधी पारसीवाडा स्मशान भुमी अंधेरी पुर्व येथे होणार आहे.

रामदास कामत गोव्याचे सुपुत्र होते. त्यांचा जन्म म्हापसा येथे दि. 18 फेब्रुवारी 1931 रोजी झाला होता. 1938 साली साखळीला पुराचा मोठा फटका बसला, तेव्हा मदतनिधीसाठी आयोजित नाटकात त्यांनी पहिल्यांदा भूमिका केली आणि दोन पदेही सादर केली होती. कामत यांचे नुसते नाव रसिकांच्या कानावर जरी आले, तरी जुन्या आणि नव्या गायकांच्या मनात त्यांच्या अजरामर गीतांची मालिका आजही उभी राहते.