मडगाव : सांकवाळ येथील जीम जॅम बार ॲण्ड रेस्टॉरंट्स या आस्थापनाचा मालक विजयन याच्यावर खुनी हल्ला करून त्याला लुटण्याच्या प्रकरणात संशयित असलेला ‘वेर्णा हायवे रॉबरी’ प्रकरणातील फरार संशयित संतोष हेमंत कुमार याने या प्रकरणात आपल्याला अटकपूर्व जामीन मिळावा यासाठी दक्षिण गोवा सत्र न्यायालयात केलेला अर्ज प्रधान सत्र न्यायाधीश शेरीन पॉल यांनी फेटाळून लावला.
संशयिताची पार्श्वभूमी गुन्हेगारी स्वरूपाची आहे आणि संशयित गोव्यात वास्तव करून रहात नाही, त्यामुळे अटकपूर्व जामीन मिळाल्यास तो फरार होण्याची शक्यता गृहित धरून हा अर्ज न्यायालयाने फेटाळला. या प्रकरणाचा तपास करण्यासाठी संशयिताला पोलिस कोठडीत घेऊन त्याची चौकशी करण्याची संधी पोलिसांना देणे योग्य ठरणार असे न्या. पॉल यांनी आपल्या आदेशात म्हटले आहे.
ही घटना ८ जानेवारी २०२५ रोजी घडली होती. रेस्टॉरंट मालक विजयन हे पहाटे ५ वाजण्याच्या सुमारास आपल्या गाडीतून जात असताना चार संशयितांनी एका गाडीने त्याचा पाठलाग करून वेर्णा येथे त्यांना अडविले होते. त्यानंतर लोखंडी सळ्या, बेसबॉल बॅटने हल्ला करून त्यांना जखमी केले.
त्यांच्या गळ्यातील दोन लाख रुपयांची सोन्याची साखळी, दहा हजार रुपये रोख आणि मोबाईलही पळविला. या हल्ल्यासाठी वापरलेली गाडी नंतर धारबांदोडा येथे टाकून दिली होती. वेर्णा पोलिसांनी या गाडीची तपासणी केली असता आतमध्ये बनावट नंबर प्लेट, ५ मंकी कॅपस्, लोखंडी सळ्या आणि बेसबॉल बॅट सापडली होती.
व्यावसायिक वादातून झाला होता हल्ला
यापूर्वी या प्रकरणात वेर्णा पोलिसांनी विश्वनाथ नाईक, गोकुळदास नाईक आणि मंदार प्रभू या तीन संशयितांना अटक केली आहे. व्यवसायातील पूर्ववैमनस्यातून हा हल्ला झाला होता हे नंतर उघडकीस आले होते. विजयन हे पूर्वी एका रेस्टॉरंटमध्ये व्यवस्थापक म्हणून कामाला होते.
मात्र त्यांनी ती नोकरी सोडून स्वत:चे रेस्टॉरंट उघडल्याने पहिल्या रेस्टॉरंट चालकाशी त्यांची व्यावसायिक दुश्मनी झाली होती. त्यातूनच त्यांच्यावर हल्ला झाला होता. या प्रकरणातील चौथा आरोपी संतोषकुमार हा फरार आहे. जोयडा-कर्नाटक येथील त्याच्या घरी जाऊन त्याचा शोध घेण्याचा प्रयत्न केला असता पोलिसांना तो सापडला नाही.
अजून सापडलेली नाही सोनसाखळी, रोख रक्कम
अटक केलेल्या तिन्ही संशयितांना जामिनावर मुक्त करण्यात आले. त्याच धर्तीवर आपल्याला अटकपूर्व जामीन मंजूर करावा यासाठी संतोषकुमार याने मडगाव सत्र न्यायालयात अर्ज केला होता. मात्र चोरीला गेलेली सोनसाखळी, दहा हजाराची रोख रक्कम संशयिताकडून जप्त करायची बाकी आहे.
संशयित परप्रांतीय असू्न तो गोव्यात रहात नाही. त्याची पार्श्वभूमी गुन्हेगारीची असून मुंबई पोलिसांनाही त्याच्यावर यापूर्वी शस्त्रास्त्र कायद्याखाली गुन्हे दाखल केले आहेत. अशा परिस्थितीत या संशयिताला जामीन दिल्यास तो फरार होण्याची भीती या अर्जाला विरोध करताना वेर्णा पोलिसांनी व्यक्त केली होती.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.