Dona Paula Jetty: दोनापावला जेटीवरील २० हून अधिक स्टॉल्‍सधारकांना जेटीबाहेर बसविण्यात आलेल्या क्युबिकल स्ट्रक्चर्समुळे ग्राहक मिळण्यास अडचणी येत आहेत. हे विक्रेते जेटीवर पर्यटकांकडून भरमसाठ प्रवेशशुल्क आकारण्याच्या विरोधात आहेत.
कारण त्‍यामुळे तेथे पर्यटकांची संख्‍या रोडावू लागली आहे. परिणामी त्‍यांचा व्यवसाय धोक्‍यात आला आहे, असे सांत-आंद्रेचे ‘आरजी’चे आमदार वीरेश बोरकर यांनी सांगितले. याप्रकरणी मुख्यमंत्र्यांनी हस्तक्षेप करून तोडगा काढावा, अशी मागणीही त्‍यांनी केली.
बोरकर यांनी आज मंगळवारी आपल्‍या कार्यकर्त्यांसह दोनापावला जेटीला भेट देऊन स्थानिक विक्रेत्‍यांच्‍या समस्‍या जाणून घेतल्‍या. यावेळी विक्रेत्‍यांनी सांगितले की, गेल्या पाच दशकांपासून अनेक स्थानिक लोक दोनापावला जेटीवर व्यवसाय करत आहेत. त्यांचे स्टॉल्‍स काही वर्षांपूर्वी जेटीवर होते आणि दुरुस्तीच्या कामावेळी ते जेटीबाहेर स्थलांतरित करण्यात आले होते.
अलीकडेच सरकारने स्थानिक स्टॉल्‍सधारकांना सामावून घेण्यासाठी २० पेक्षा जास्त घनसंरचना बांधल्या. परंतु हे स्टॉल्‍स खूपच लहान असल्याने विक्रेत्यांना त्याचा काहीच फायदा होत नाही. आता तर जेटीवर प्रवेशशुल्क आकारण्यात येत असल्‍यापासून पर्यटकांनी पाठ फिरविली आहे. त्‍यामुळे आमचा व्यवसाय थंडावला आहे, असे एका विक्रेत्या महिलेने सांगितले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
