Bicholim Mining: 'आमचे ट्रक घ्या आणि पोटापाण्याची व्यवस्था करा'! डिचोलीतील ट्रकमालकांची आर्त विनवणी

Bicholim Mining Truck Owners Problems

डिचोली: खनिज वाहतुकीचा मार्ग मोकळा झाला नाही, तर आम्ही रस्त्यावर पडून आमचे भवितव्य उद्‌ध्वस्त होणार आहे, अशी भीती डिचोलीतील ट्रकमालकांनी व्यक्त करून खनिज वाहतुकीला विरोध करणाऱ्यांनी आमच्या भवितव्याचा विचार करावा, अशी मागणी केली आहे.

खनिज वाहतूक सुरळीतपणे सुरू झाली नाही, तर आमच्यासमोर जीवन मरणाचा प्रश्न निर्माण होणार असून, वेळप्रसंगी टोकाचे पाऊलही उचलण्याची वेळ येणार, अशी भीती उदेश मांद्रेकर, महेश्वर पेडणेकर, प्रकाश नाईक आणि अन्य ट्रकमालकांनी व्यक्त केली आहे.

‘वेदांता’च्या खनिज वाहतुकीला ‘ब्रेक’ लागल्यामुळे डिचोलीतील ट्रकमालक सध्या चिंतेत पडले आहेत. आधीच आम्ही आर्थिक संकटाच्या फेऱ्यात गटांगळ्या खात आहोत. त्यातच खनिज वाहतुकीचा मार्ग अनिश्चित बनल्याने भवितव्य अंधःकारमय बनले आहे, अशी व्यथा ट्रकमालक व्यक्त करत आहेत.

खनिज वाहतूक पूर्ववत सुरू झाली नाही, तर सरकाराने आमचे ट्रक घ्यावेत आणि आमच्यासह कुटुंबांच्या पोटापाण्याची व्यवस्था करावी, अशी मागणी ट्रकमालकांनी केली आहे. खाणीला विरोध करणाऱ्या रमेश गावस यांनी ट्रकमालकांचाही विचार करावा, अशी मागणी उदेश मांद्रेकर आणि अन्य ट्रकमालकांनी केली आहे.

कर्ज कसे फेडावे?

जवळपास बारा वर्षांच्या खाणबंदीमुळे बहुतेक ट्रकमालकांच्या डोक्यावर कर्जाचे ओझे आहे. आताच कुठे तरी खाण सुरू होऊन काम मिळाले होते. कंपनीकडून कर्ज घेऊन ट्रकांची दुरुस्ती करून खनिज वाहतुकीसाठी आम्ही ट्रक रस्त्यावर उतरविले होते.

मात्र, पुन्हा खनिज वाहतूक बंद झाल्याने ट्रकमालकांसमोरील संकट आणखी गडद झाले आहे. काम नाही, तर कर्जाचे हप्ते कसे फेडावेत, ट्रकचालकांना पगार कसा द्यावा, हे प्रश्न आम्हाला सतावू लागले आहेत, असे महेश्वर पेडणेकर आणि प्रकाश नाईक यांनी म्हटले आहे.