वास्को : मुरगाव सडा एफसीआय गोदाम मागे बोगदा येथील सामाजिक कार्यकर्ते सचिन भगत यांच्यावर हल्ला करणाऱ्यांवर पोलिसांनी भादंस ३०७ कलमाखाली गुन्हा नोंद न केल्याने, या भागातील रहिवाशांनी नाराजी व्यक्त केली आहे. तसेच मुरगावातील कायदा सुव्यवस्था पूर्णपणे ढासळलेली असून मुरगावात जंगलराज सुरू असल्याची टीका सामाजिक कार्यकर्ते शंकर पोळजी यांनी केली.
भगत यांना मारहाण करणाऱ्यांविरोधात पोलिसांनी खुनाचा प्रयत्न केल्याचे भादंस ३०७ कलम न लावल्याने मुरगाव सडा, बोगदा, जेटी व बायणा परिसरातील रहिवाशांनी जेटी येथील श्री कलमदेव खाप्रेश्वर मंदिराकडे एकजूट होऊन मेणबत्ती पेटवून निषेध व्यक्त केला आहे.
मुरगाव बोगदा येथील समाजकार्यकर्ते सचिन भगत व सडा भागातील शेखर दाभोलकर यांच्यावर गुरुवार (दि.२३) रोजी सडा एफसीआय गोदाम मागे संशयित पवन कोळमकर, ब्रिटो राज, सुरज चोडणकर, ओमकार दुर्भाटकर यांनी हल्ला करून गंभीर जखमी केले होते.
याप्रकरणी जखमी सचिन भगत यांनी मुरगाव पोलिस स्थानकांत मारहाण करणाऱ्या चारहीजणा विरोधात तक्रार दाखल केली होती. पोलिसांनी यातील फक्त ब्रिटो राज याला अटक करून नंतर त्याची जामिनावर सुटका केली. इतरांनी अटकपूर्व जामिनासाठी अर्ज दाखल केला असून ५ एप्रिल रोजी सुनावणी होणार आहे.
पत्रकारांशी बोलताना शंकर पोळजी म्हणाले की, सडा परिसरात गुंडगिरीत वाढ झाली असून यात गेली अनेक वर्षे पूर्णपणे बंद असलेले मटका, जुगार तेजीत आहे. सडा बरोबर इतर ठिकाणी सुरू असलेले जुगार व अनैतिक व्यवसाय पोलिसांनी त्वरित बंद पाडावा.
म्हणून ३०७ अन्वये गुन्हा नोंद नाही !
मुरगाव पोलिस स्थानकांत संपर्क साधला असता तक्रारदार सचिन भगत यांच्यावर हल्ला करणाऱ्यांवर कायदेशीर गुन्हे नोंद केले आहेत. तसेच भगत यांना गंभीर दुखापत न झाल्याने संशयितावर भादंस ३०७ गुन्हा नोंद होऊ शकत नाही. याप्रकरणी पोलिसांनी कायद्याच्या चौकटीत राहून संशयितांवर गुन्हे दाखल केले असल्याची माहिती पोलिसांनी दिली आहे.
सचिन भगत यांच्यावर हल्ला म्हणजे मुरगावचे आमदार संकल्प आमोणकर यांच्यावर हल्ला आहे. भगत हे आमदार आमोणकर यांचे सच्चे मित्र तसेच कार्यकर्ते असून त्यांनी भगत यांच्या पाठीशी उभे राहिले पाहिजे. तसेच पोलिसांनी चारही आरोपींवर भादंस ३०७ गुन्हा दाखल करावा.
- जयेश शेटगांवकर, तृणूमुल काँग्रेसचे सदस्य
आपल्याला न्याय मिळेपर्यंत आपण लढा देणार आहे. चौघांनी आपल्यावर जीवघेणा हल्ला केला. पोलिसांनी याप्रकरणी सर्व आरोपींवर भादंस ३०७ नुसार गुन्हा नोंद करायला हवा.
- सचिन भगत, सामाजिक कार्यकर्ते
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.