Vasco News : समुद्रकिनारी मृत माशांचा खच; रासायनिक पदार्थ सोडल्याने धोका

Vasco News :

वास्को, झुआरीनगर येथील मेसर्स प्रदीप फॉस्फेट्स लिमिटेड (आधीची मेसर्स झुआरी ॲग्रो केमिकल्स लि.)कडून अरबी समुद्रात मोठ्या प्रमाणात रासायनिक पदार्थ सोडण्यात येत असल्यामुळे दांडो-वेळसाव येथील ‘पोईम’ या नावाने प्रसिद्ध असलेल्या खाऱ्या पाण्याच्या खोऱ्यात मोठ्या प्रमाणात मृत माशांचा खच पडला आहे.

गेल्या अनेक वर्षांपासून या कंपनीकडून असा प्रकार घडत असल्याचा आरोप ‘गोयच्या रापोणकारांचो एकवोट’ आणि त्यांच्या सहयोगी संघटनांनी केला आहे.

वेळसाव समुद्र‌किनारा हा लांब पल्ल्याचा समुद्रकिनारा असून अनेक मच्छीमारी समुदाय या ठिकाणी मासेमारी करून आपली उपजीविका चालवतात. या समुद्रकिनाऱ्याला जोडून वरच्या डोंगराळ भागात मे. प्रदीप फॉस्फेट्स लिमिटेड ही कंपनी कार्यान्वित आहे. गेल्या अनेक वर्षांपासून या कंपनीद्वारे अरबी समुद्रात मोठ्या प्रमाणात रासायनिक पदार्थ सोडत असल्याचे येथील मच्छीमार बांधवांच्या निदर्शनास आले आहे.

गेल्या दोन दिवसांपासून पाळे-वेळसावच्या खाडीत आणि दांडो-वेळसाव येथील ‘पोईम’ या नावाने प्रसिद्ध असलेल्या खाऱ्या पाण्याच्या खोऱ्यात मोठ्या प्रमाणात माशांचा मृत्यू होत असल्याने येथील मच्छीमारांचे नुकसान होत आहे.

दरम्यान, यासंबंधी झुआरीनगर येथील मेसर्स प्रदीप फॉस्फेट्स लि. या कंपनीशी याबाबत त्यांची प्रतिक्रिया जाणून घेण्यासाठी संपर्क साधण्याचा प्रयत्न केला असता तो होऊ शकला नाही.

राज्य प्रदूषण नियंत्रण मंडळाने तपासणी करावी

१ ‘गोंयच्या रापोणकारांचो एकवोट’ आणि त्यांच्या सहयोगी संघटनांनी गोवा राज्य प्रदूषण नियंत्रण मंडळाने बाधित क्षेत्रांना त्वरित भेट देऊन पाणी आणि माशांचे नमुने गोळा करून तपासणी करावी. तसेच समुद्राचे पाणी दूषित करून पर्यावरणाच्या दृष्टीने घातक ठरणाऱ्या कंपनीविरुद्ध कठोर कारवाई करावी, अशी मागणी केली आहे.

२ गेल्या अनेक वर्षांपासून कंपनीकडून अशाप्रकारचे गुन्हेगारी कृत्य वारंवार घडत असल्याचा आरोप मच्छीमार समाजातील ज्येष्ठांकडून केला जात आहे. तसेच यापुढे आपल्या पर्यावरणाच्या आणि समुदायाच्या व्यापक हितासाठी अशा उल्लंघनाची पुनरावृत्ती होणार नाही याची खात्री करून घ्यावी, अशी जोरदार मागणी करण्यात आली आहे.