वार्का येथील वृद्धाचा खून जमीन व्यवहारातून?

मडगाव : वार्का (Varca) येथे काल रात्री त्रिनिदाद मार्टिन्स या 80 वर्षीय ज्येष्ठ नागरिकाचा नेमका कुठल्या कारणासाठी खून करण्यात आला हे अजूनही स्पष्ट झालेले नाही. मात्र, हा खून कदाचित जमीन व्यवहारातून झाला असावा अशी शंका व्यक्त करण्यात येत आहे. यासंबंधी पोलिस तपास चालू आहे. मात्र, प्रकरण संवेदनशील असल्याने पोलिसांनी (police) याबाबत तूर्त तरी मौन पाळले आहे.

मार्टिन्स यांच्या डोक्यावर लोखंडी दांड्याने वार करून त्यांचा खून केला होता. रात्री उशिरा हा प्रकार उघडकीस आला. ज्या तरेने खुन्याने घरातील कुठल्याही वस्तूला हात लावलेला नाही त्यावरून हा खून (murder) चोरीच्या उद्देशाने केलेला नसून त्यामागे दुसरेच कारण असावे असा तर्क पोलिस व्यक्त करत आहेत. मयत मार्टिन्स घरात एकटेच राहत असत. काल त्यांच्या कुटुंबियांनी त्यांना फोन करण्याचा प्रयत्न केला असता दुसऱ्या बाजूने प्रतिसादच येत नव्हता.

त्यामुळे काहीतरी अघटित घडले असावे या संशयाने त्यांनी कोलवा पोलिसांना त्याची खबर दिली. पोलिसांनी त्याच्या घरी येऊन पाहिले असता, बाहेरचा दरवाजा त्यांना उघडलेला दिसला. आत मार्टिन्स यांचा रक्ताच्या थारोळ्यात पडलेला मृतदेह त्यांना दिसून आला.