Valpoi: वाळपईतील रुग्णांसाठी 'फिजिओथेरपी' वरदान, वर्षभरात शेकडो रुग्‍णांना लाभ; 3200 उपचार सत्रांचे आयोजन

वाळपई: वाळपईतील सामाजिक आरोग्य केंद्रामध्ये एक वर्षापूर्वी सुरू करण्यात आलेल्या फिजिओथेरपी युनिटने यशस्वीपणे आपला पहिला वर्षपूर्तीचा टप्पा पूर्ण केला आहे. ग्रामीण भागात आरोग्य सेवा पोहोचवण्याच्या उद्देशाने सुरू झालेल्या या केंद्राचा लाभ आतापर्यंत शेकडो रुग्‍णांनी घेतला असून, ३२०० हून अधिक उपचार सत्रे झाली.

या केंद्रात विविध प्रकारच्या फिजिओथेरपी उपचार सुविधा उपलब्ध असून, वाळपईसह संपूर्ण सत्तरी तालुक्यातील रुग्ण येथे उपचारासाठी येत आहेत. दरमहा सरासरी ३०० रुग्ण या केंद्रात येतात. मणक्याचे आजार, सांधेदुखी, स्नायूंचे विकार, फ्रॅक्चरनंतरचे पुनर्वसन अशा अनेक प्रकारांतील उपचार येथे अत्याधुनिक उपकरणांद्वारे मोफत दिले जात आहेत.

आरोग्यमंत्री विश्वजीत राणे यांच्या पुढाकाराने व पाठपुराव्यामुळे सुरू झालेले हे केंद्र आता ग्रामीण भागातील रुग्णांसाठी उपयुक्ततेचे ठिकाण बनले आहे. गेल्या वर्षी ऑगस्टमध्ये वाळपई आरोग्य क्रेंदात स्वतंत्र असे फिजिओथेरपी सेंटरची सुरुवात झाली.

पुर्वी जवळपास ही सुविधा नसल्याने रुग्णांना म्हापसा जिल्हा रुग्णालयात किंवा गोमेकॉत जावे लागत होते. वर्षपूर्ती निमित्त होत असल्याने आरोग्याधिकारी डॉ. विकास नाईक, अकिब शेख आणि डॉ. अजून गावस यांनी माहिती दिली.

डॉ. विकास नाईक म्‍हणतात...

आरोग्य मंत्री विश्वजीत राणे यांनी आरोग्य केंद्राची गरज समजून येथे सुरू केले आहे. फिजिओथेरपी सेवा सर्वांसाठी सुलभ व मोफत मिळावी हा यामागचा मुख्य उद्देश आहे.

ब्रेन स्टोक, ब्रेन हॅमेरेज, अपघात झालेले रुग्ण येथे येऊन बरे होऊन जातात आणि त्यांच्याकडून मिळणारा चांगला प्रतिसाद यामुळे खूप समाधानी वाटते. येथे लहान मुलापासुन ते वृध्दापर्यंतचे रुग्ण याचा लाभ घेत आहे.

येथे एका वर्षात ३२०० हून अधिक उपचार सत्रे झाली आहेत. फिजिओथेरपी सेंटरमध्ये व्यायाम थेरपी आणि इलेक्ट्रोथेरपीसह अनेक सेवा प्रदान करण्यात आलेली आहे, न्यूरोलॉजिकल, मस्कुलोस्केलेटल, स्पोर्ट्स दुखापती आणि पोस्टऑपरेटिव्ह पुनर्वसन आदींची सेवेसाठी मोठ्या संख्येने दररोज रुग्ण येतात. - डॉ. अनुजा गावस