Goa Dogs vaccination: गोव्यात एकूण 6,000 श्वानांचे लसीकरण; जागतिक रेबीज दिनी सुरू झाली होती मोहिम

Goa Dogs vaccination: गोव्यात जागतिक रेबीज दिन साजरा करण्यात आला. दरवर्षी 28 सप्टेंबर हा जागतिक रेबीज दिन म्हणून साजरा केला जातो. या दिवशी, सुरू करण्यात आलेल्या मोहिमेतून गोव्यातील सहा तालुक्यात 6,000 कुत्र्यांचे लसीकरण करण्यात आले. यात 16 आमदार आणि 4 मंत्र्यांचे सहकार्य लाभले.

रेबीजचा सामना करणे आणि कुत्र्यांचे आरोग्य सुधारणे हे या मोहिमेचे उद्दिष्ट आहे. 2013 मध्ये गोव्यात मिशन रेबीज लाँच करण्यात आले होते. दरम्यान, गोव्याची राजधानी पणजीमध्ये 86 पाळीव कुत्र्यांना मायक्रोचिप बसवण्यात आली आहे. दोन दिवसात ही मायक्रोचिप बसवली गेली आहे.

या मायक्रोचिपमध्ये एक युनिक आयडेंटिफिकेशन नंबर असतो. तो नंबर स्कॅन केल्यावर संबंधित कुत्र्याची सर्व माहिती उपलब्ध होते. त्यातून त्याच्या लसीकरणाची स्थिती काय आहे, संबंधित कुत्र्याच्या मालकाची माहिती त्यातून मिळते.

प्राण्यांचे डॉक्टर तसेच प्राणी अधिकारी हा नंबर स्कॅन करू शकतात. शिवाय हरवलेल्या श्वानांना त्यांच्या मालकापर्यंत परत पोहचविण्यासाठीही या मायक्रोचिपचा फायदा होऊ शकतो.