गोव्यातील 15-18 वयोगटातील मुलांचे लसीकरण सुरू

पणजी: गोव्यात आज (सोमवार) पासून 15-18 वयोगटातील मुलांसाठी लसीकरण मोहीम सुरू करण्यात आली आहे. आरोग्य विभागातील लसीकरण पथक राज्यभरातील 529 लसीकरण केंद्रांवर मुलांचे लसीकरण करेल.

"लसीकरण (Vaccination) संमती फॉर्मवर पालकांनी स्वाक्षरी करणे आवश्यक आहे. ख्रिसमसच्या सुट्टीनंतर सोमवार हा शाळांसाठी पहिला कामकाजाचा दिवस आहे. त्यामुळे कदाचित संमिश्र प्रतिसाद मिळेल," असे शिक्षण विभागातील एका वरिष्ठ अधिकाऱ्याने सांगितले.

गोवा सरकारने (Goa government) 72,000 मुलांचे लसीकरण करण्याचे उद्दिष्ट ठेवले आहे. सोमवारी ही मोहीम सुरू झाल्यानंतर चार दिवसांत उद्दिष्ट गाठण्याचा प्रस्ताव असल्याचे आरोग्यमंत्र्यांनी रविवारी सांगितले.

ते पुढे म्हणाले, "आम्हाला 15 ते 18 वर्षे वयोगटातील मुलांचे लसीकरण करण्यासाठी डोसचा साठा आधीच मिळाला आहे." लसीकरण होणाऱ्या विद्यार्थ्यांनी (Students) स्वत:बरोबर कोणतेही सरकारमान्य ओळखपत्र बाळगणे आवश्यक आहे. विद्यार्थ्यांना एक हेल्पलाइन नंबर प्रदान केला जाईल ज्यावर ते लसीकरणाबाबतच्या कोणत्याही स्पष्टीकरणासाठी संपर्क साधू शकतात."