गोव्यात 1 डिसेंबरपासून लसीकरण मोहीम फक्त आरोग्य केंद्रांवरच

पणजी: गोव्यात (Goa) 87% लोकांचे लसीकरणात (vaccination) दोन्ही डोस झाले असल्याने आता सरकारी क्षेत्रात, 1 डिसेंबरपासून फक्त आरोग्य केंद्रावरच दैनंदिन लसीकरण करण्यात येणार आहे. शाळा, पंचायती इत्यादी ठिकाणी उभारण्यात आलेली सर्व तात्पुरती लसीकरण केंद्रे नोव्हेंबर अखेर बंद करण्यात येणार आहेत.

लसीकरण 1 डिसेंबरपासून, 35 सरकारी आरोग्य केंद्रावर सुरू राहील. कारण शाळेत सुरु असलेल्या लसीकरणाच्या जागेची मागणी शाळा प्रशासनाने केली आहे. त्यामुळे हा निर्णय घेण्यात आला आहे. असे आरोग्य सेवा संचालक डॉ. इरा आल्मेडा यांनी सांगितले. दोन जिल्हा आणि दोन उपजिल्हा रुग्णालये, सहा सामुदायिक आरोग्य केंद्रे आणि 24 प्राथमिक आरोग्य केंद्रांवर आता लसीकरण होणार आहे.

“हर घर दस्तक मोहिमेचा एक भाग म्हणून महिन्याच्या अखेरीपर्यंत लसीकरण पथके लसीकरणावर लक्ष केंद्रित करत आहेत. दररोज ते गावोगावी जाऊन आरोग्य केंद्रात न पोहोचलेल्यांचे लसीकरण करत आहेत. याबाबत परिस्थितीचा आढावा घेण्यात येत आहेत. रविवारी 4 हजार 314 व्यक्तींनी त्यांचा दुसरा डोस घेतला आणि 1 हजार 008 जणांनी लसीचा पहिला डोस घेतला. आजपर्यंत 10.2 लाख लोकांना दोन्ही डोस देण्यात आले आहेत तर, 2.37 लाखांना लोकांनी एक डोस घेतला आहे. गोव्यात सध्या लसीचे 2.13 लाख डोस शिल्लक आहे.