UTAA Controversy: 'वेळीप यांचे दर निवडणुकीत पक्षविरोधी काम', भाजपचे प्रत्त्युत्तर; आदिवासी नेत्यांनी साथ सोडल्याचा दावा

पणजी: आदिवासी समाज आपल्यासोबत असल्याचा दावा करून सत्ताधारी भाजपला धमकावणाऱ्या प्रकाश शंकर वेळीप यांना अखेर आज भाजपने त्यांची जागा दाखवली. वेळीप यांच्यासोबत आदिवासी समाजाचे लोकप्रतिनिधीही नसल्याचे भाजपने आज सिद्ध केले.

भाजपच्या येथील कार्यालयात घेतलेल्या पत्रकार परिषदेत या नेत्यांनी त्याही पुढे जात वेळीप यांनीच दर निवडणुकीत भाजपविरोधी उमेदवाराचे काम केल्याचा आरोप करत त्यांची पोलखोल केली. दोन दिवसांपूर्वी वेळीप यांनी गोमंतक गौड मराठा समाज आणि उटा या संघटनांवरील बंदी न उठवल्यास आदिवासी समाज येत्या निवडणुकीत भाजपला धडा शिकवेल, असा इशारा दिला होता.

भाजपचे दक्षिण गोवा जिल्हाध्यक्ष प्रभाकर गावकर म्हणाले, सताना कधीच भाजपला मतदान केलेले नाही. संघटनेवर भाजप किंवा सरकारने नव्हे, तर न्यायालयाने बंदी घातली आहे. त्यामुळे वेळीप हे खोटे बोलत आहेत हे सिद्ध आहे. आदेश मान्य नसल्यास त्याविरोधात दाद मागता येते. २००४ साली ‘उटा’ स्थापन झाली, तेव्हापासून आम्ही माजी आमदार वासुदेव मेंग गावकर, सभापती रमेश तवडकर, स्व. काशिनाथ जल्मी, आमदार गणेश गावकर आदींनी उटा संघटनेसाठी काम केले आहे. वेळीप यांनी ही एकट्याची संघटना समजू नये.

यावेळी दक्षिण गोवा जिल्हा पंचायत अध्यक्ष संजना वेळीप, जिल्हा पंचायत सदस्य धाकू मडकईकर, सुरेश केपेकर, खुशाली वेळीप, शाणू वेळीप, अनुसूचित जाती-जमाती महामंडळाचे अध्यक्ष वासुदेव मेंग गावकर, आदिवासी मोर्चाचे उपाध्यक्ष ॲॅन्थनी बार्बोझा आदी उपस्थित होते.

वेळीपांवर विश्‍वास ठेवू नका!

प्रेरणा दिनावेळी दिले जाणारे पुरस्कार ‘उटा’ नव्हे, तर आदिवासी कल्याण खाते देते. ‘उटा’ ही १४ जणांची संघटना, हेच धक्कादायक आहे. ‘उटा’चे आजवरचे सचिव उदय गावकर आहेत. त्यांनी ‘उटा’ संघर्ष पुस्तकात संघटनेचा इतिहास मांडला आहे. त्याच्याशी वेळीप असहमती का दर्शवत आहेत. ‘उटा’नेच पुस्तक प्रकाशनासाठी आर्थिक मदत दिली. त्यामुळे वेळीप यांच्यावर कोणी विश्वास ठेवू नये, असे गावकर म्हणाले.

पद मिळविण्यासाठी बदलले वारंवार रंग

भाजपचे सरकार सत्तेवर आल्यावर केवळ पद मिळवण्यासाठी वेळीप यांनी वारंवार रंग बदलल्याचा आरोप करून प्रभाकर गावकर म्हणाले, वेळीप सहकार पुरस्कार निवड समितीचे अध्यक्ष असताना त्यांनी ‘सहकाररत्न’ पुरस्कार स्वतःच्या पदरात पाडून घेतला.