Goa ST Reservation: "'एसटीं'च्या सहनशीलतेचा अंत नको!" राजकीय आरक्षणाच्या मागणीसाठी उतोर्डा येथील बैठकीत 'उटा' आक्रमक

मडगाव: राजकीय आरक्षणाबाबत आता ‘उटा’ संघटना आक्रमक झाली असून, आदिवासी समाजाचा अंत बघू नये, असा निर्वाणीचा इशारा आज उतोर्डा येथे झालेल्या ‘उटा’च्या बैठकीत देण्यात आला.

त्यावेळी ‘उटा’ संघटनेच्या अध्यक्षपदी पुन्हा प्रकाश वेळीप यांची निवड करण्यात आली. या बैठकीस सभापती गणेश गावकर, आदिवासी कल्याण खात्याचे मंत्री रमेश तवडकर, आमदार गोविंद गावडे, आमदार आंतोन वाझ, गोविंद शिरोडकर तसेच समाजातील अन्य नेते उपस्थित होते.

यावेळी सभापती गणेश गावकर म्हणाले, मी ‘सभापती’ या नात्याने नव्हे, तर या समाजाचा एक घटक व आमदार म्हणून या बैठकीला उपस्थित राहिलो आहे, असे सांगतानाच आजचा हा ऐतिहासिक दिवस असून, आम्ही सातत्याने राजकीय आरक्षणाचा पाठपुरावा केला आहे. मात्र, याबाबत अजूनही अधिसूचना काढलेली नाही. आमच्या विश्वासाला तडा जाऊ देऊ नये, कोण राजकारण करतो हे माहीत नाही. आम्हाला घटनेने दिलेला हक्क मिळालाच पाहिजे.

आमदार गोविंद गावडे यांनी आज ‘उटा’ संघटना मजबूत झाल्याचे सांगितले. गोविंद शिरोडकर यांनी आदिवासी समाजाकडे बघण्याचा दृष्टिकोन बदलण्याची गरज असल्याचे सांगतानाच आम्ही कोणत्याही राजकीय पक्षाच्या दावणीला बांधले गेलेलो नाहीत, असे सांगितले. अन्य समितीच्या इतर सदस्यांची नियुक्ती लवकरच केली जाईल, असे यावेळी सांगण्यात आले.

अंतर्गत मतभेद दूर : रमेश तवडकर

‘उटा’ संघटनेमधील अंतर्गत वादही आता मिटला असून, या संघटनेच्या नेतृत्वाखाली आता समाजाच्या हक्कासाठी पुढील लढा दिला जाईल, असेही यावेळी स्पष्ट करण्यात आले. मंत्री रमेश तवडकर म्हणाले, की आमच्यातील मतभेद आता दूर झाले आहेत. संघटना मजबूत करण्यावर आमचा आता भर असेल. राजकीय आरक्षण एका महिन्यात मिळावे, यासाठी आमचे प्रयत्न असतील.

रस्त्यावर येण्याची वेळ येऊ देऊ नका

प्रकाश वेळीप यांनी आता सरकारने आमच्या सहनशीलतेची आणखी परीक्षा पाहू नये, असे खडसावून सांगितले. २०२७ च्या निवडणुकीत घटनेने दिलेल्या हक्कानुसार आम्हाला १२ टक्के राजकीय आरक्षण मिळाले पाहिजे, ते द्यावे. एसटी समाजबांधवांनी रस्त्यावर येण्याची वाट पाहू नये, असेही त्यांनी सुनावले.