Chapora River Illegal Sand Mining
मोरजी: आगरवाडा-चोपडे नागरिक समितीच्या स्ट्रिंग ऑपरेशनमुळे चोपडे येथे शापोरा नदीत चाललेला बेकायदा रेती उपसा उघड झाला असून पोलिसांचे मात्र या प्रकाराकडे दुर्लक्ष होत आहे.
आगरवाडा-चोपडे ग्रामपंचायतीत तक्रार दाखल झाल्यानंतर पंचायतीने याबाबत शापोरा नदीत गस्त घालण्यासाठी नियुक्त केलेल्या शिवोली किनारी व्यवस्थापन पोलिसांशी संपर्क साधून त्यांना याबाबत पुढील कारवाई करण्याची मागणी केली होती. या निवेदनाला प्रतिसाद देताना शापोरा नदीत कुठल्याही प्रकारचा अवैध रेती उपसा व्यवसाय होत नसल्याचे आगरवाडा-चोपडे पंचायतीला कळविले होते.
आगरवाडा चोपडे ग्रामपंचायतीच्या ग्रामसभेत हा विषय पुन्हा चर्चेत आला होता, या बेकायदा रेती उपशावर कडक कारवाई करण्यात मात्र शापोरा नदीत रात्रीचा खेळ चालूच असल्याचे आढळून आल्याने याबाबत कारवाईसाठी आगरवाडा-चोपडे नागरिक समितीने शिवोली किनारी पोलिस स्थानकाच्या निरीक्षकांशी संपर्क साधल्यानंतर त्या रेती माफियांना पकडण्याऐवजी त्यांना याबाबत सूचना देऊन घटना स्थळावरून पलायन करण्याची संधी दिली जाते.
त्यामुळे शापोरा नदीत चाललेल्या या रात्रीच्या खेळाविरुद्ध आगरवाडा नागरिक समितीने यापुढे आपले स्ट्रिग ऑपेरेशन चालूच ठेवण्याचा निर्णय घेतला आहे.
आगरवाडा-चोपडे नागरिक समितीला शापोरा नदीत रेती उपसा चालू असल्याचे आढळून आले. या रेती माफियाना पकडण्याची योजना आखली. त्यानुसार ३ रोजी रात्री ११.३० च्या सुमारास नागरिक समितीचे सदस्य एकत्रित आले आणि त्यांनी शापोरा नदीत अंधारात रेती उपसा करणाऱ्या ३ होड्यावर नजर ठेवली. नेहमीप्रमाणे या होड्या किनाऱ्यावर आल्यानंतर त्यांना रंगे हात पकडण्याचे ठरवले. त्यानुसार सर्वजण होड्यावर नजर ठेवून होते. त्यावेळी शिवोली किनारी व्यवस्थापन पोलिस आपली मशीन असलेली होडी घेऊन त्या बाजूने येत असल्याचे आढळून आले. किनारी पोलिस रेती उपसा करणाऱ्या होड्या ताब्यात घेतील असे वाटले, परंतु त्यांनी कोणतीही कारवाई केले नाही. याबाबत स्थानिकांत आश्‍चर्य व्यक्त करण्यात येत आहे.
शापोरा नदीत चाललेल्या बेकायदा रेती उपशावर नियंत्रण येणे आवश्‍यक आहे. संबंधित खात्याने त्वरित कारवाई करावी, अशी चोपडे-आगरवाड्यातील ग्रामस्थांची मागणी आहे. लक्ष ठेवणारेच जर का बेकायदा कृतीकडे दुर्लक्ष करीत असतील तर पर्यावरणीय हानी मोठ्या प्रमाणात होईल आणि नदी पात्रातील जैविक संपत्तीचेही नुकसान होईल, असेही स्थानिकांचे मत आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.