मये परिसरात जलवाहिनी फुटण्याचे प्रकार चालूच

डिचोली: मये भागात जलवाहिनी फुटण्याचे प्रकार चालूच असून दिवसेंदिवस ही समस्या गंभीर बनत आहे. जलवाहिनी फुटली की नळाद्वारे होणाऱ्या पाणीपुरवठ्यावर परिणाम होत असल्याने विशेषत गृहिणींना समस्येला तोंड द्यावे लागत आहे. सध्या गावकरवाडा आणि आदिनाथ मठ मिळून दोन ठिकाणी जलवाहिनी फुटून पाण्याचा अपयव्य चालू आहे. गेल्या दोन महिन्यांहून अधिक काळापासून मये भागात अधूनमधून वेगवेगळ्या भागात जलवाहिनी फुटत आहे.

मये भागात नव्याने जलवाहिनी टाकण्यात आली आहे. मात्र, ही जलवाहिनीही फुटत आहे. बेदरकार खनिज वाहतुकीमुळे ही समस्या उद्भवत आहे. फुटलेल्या जलवाहिनीची दुरुस्ती करण्याकडे संबंधितांकडून दुर्लक्ष होत आहे अशी नागरिकांची तक्रार आहे.

जलवाहिनी पुन्हा फुटली

तब्बल महिनाभर बंद असलेली खनिज वाहतूक दोन दिवसांपासून पुन्हा सुरू झाली आहे. खनिज वाहतूक सुरू होताच पुन्हा जलवाहिनी फुटण्याचे प्रकार चालू झाले आहेत.