कामुर्लीतही रेतीचा उपसा!

म्हापसा: कामुर्ली भागात प्रामुख्याने तारवाडा (फेरीबोट परिसर) आणि भरणवाडा या भागात तसेच पीर्णमध्येही शापोरा नदीच्या पात्रातून गेल्या काही वर्षांपासून शासकीय नियमांचा तसेच कायद्याचा भंग करून रात्रीच्या वेळी होड्यांच्या साहाय्याने रात्रीच्या वेळी मोठ्या प्रमाणात रेतीचा उपसा केला जात आहे. याबाबत बंदर कप्तान खाते तसेच उद्योग व खाण खाते पाहणी करण्याचे केवळ नाटक करीत असल्याचा आरोप स्थानिक पर्यावरणप्रेमींकडून केला जात आहे.

नदीतून अनधिकृतपणे रेती काढण्याचा हा व्यवसाय रात्रीच्या वेळी तेजीत असतो. रातोरात ती रेती ट्रकांमध्ये भरून पहाटेपर्यंत संबंधिक ग्राहकांच्या घरापर्यंत पोहोचवली जात असते. शासकीय अधिकारी यासंदर्भात केवळ दिवसाच्या वेळी पाहणी करत असतात. रात्रीच्या वेळी पाहणी करून संबंधितांवर कारवाई करण्याची कोणतीही ठोस यंत्रणा राज्य सरकाराकडे नसल्याने अशा या बेकायदा व्यवसायिकांचे आयतेच फावते.

कामुर्ली परिसरात अडगळीच्या भागांत दिवसाढवळ्याही रेतीउपसा केला जातो. परंतु, त्या भागांत स्थानिकांची घरे दाटीवाटीने असल्याने त्या परिसरात प्रवेश करणेही शासकीय अधिकाऱ्यांना शक्य होत नाही. यदाकदाचित कारवाईसाठी शासकीय अधिकारी आलेच तर प्रमुख नाक्यावर तैनात केलेली त्या व्यवसायिकांची माणसे त्यासंदर्भात लगेच मोबाइल फोनवरून त्या व्यवसायिकांना वर्दी देत असतात व त्यामुळे कारवाई करणेही शासकीय अधिकाऱ्यांना शक्य होत नाही.

या बेकायदा व्यवसायाबाबत बहुतांश स्थानिक नागरिक नाराजी व्यक्त करीत असले तरी राजकीय वरदहस्त लाभलेल्या त्या बलाढ्य रेती माफियांच्या विरोधात उघडणपणे वक्तव्य करण्यास कुणीही धजावत नाही. दिवसा त्या होड्या अडगळीच्या ठिकाणी ठेवल्या जातात व रात्रीच्या वेळी ते व्यवसायिक स्वत:चा कार्यभाग उरकत असतात, अशी माहिती स्थानिकांनी दिली.

90 टक्के कामगार परप्रांतीय

कामुर्लीत रेतीव्यावसायिक स्थानिक असले तरी त्यासंदर्भातील नव्वद टक्के कामगार परप्रांतीय आहेत. रेतीचा उपसा करणाऱ्या प्रत्येक होडीत किमान तीन कामगार आवश्यक असतात. त्यामुळे सध्या कामुर्लीत सुमारे साठ-सत्तर परप्रांतीय कामगार वास्तव्यास आहेत.