मडगावचे दोन नगरसेवक तृणमुलमध्ये दाखल

मडगाव: एकेकाळी आमदार दिगंबर कामत यांचे समर्थक असलेले मात्र मागच्या नगरपालिका निवडणुकीच्यावेळी हे संबंध बिघडलेले घनश्याम शिरोडकर व महेश आमोणकर या मडगावच्या दोन नगरसेवकानी आज तृणमुल काँग्रेस पक्षात प्रवेश केला.

दिगंबर कामत (Digambar Kamat) याना जिथे पाठिंबा जास्त आहे अशा मोती डोंगर आणि खारेबांध या भागातील हे दोन्ही नगरसेवक असल्याने त्यांचे तृणमुल (TMC) पक्षात जाणे कामत याना काही प्रमाणात अडचणीचे ठरू शकते. आज या दोन्ही नगरसेवकांचे तृणमुलचे राष्ट्रीय उपाध्यक्ष लुईझींन फालेरो आणि राज्यसभा खासदार डेरीक ओब्रायन यांनी स्वागत केले. यावेळी काँग्रेस (Congress) पक्षातून यापूर्वी तृणमुल पक्षात सामील झालेल्या मडगावच्या माजी नगराध्यक्ष डोरिस टेक्सेरा याही उपस्थित होत्या.

यावेळी बोलताना शिरोडकर यांनी मडगावचे आमदार दिगंबर कामत यांच्यावर टीका करताना मागच्या पाच वर्षात ते फक्त मॅच फिक्सिंग करण्यात व्यस्त असल्याने मडगावचा विकास खुंटला. मडगावचे आता भले व्हावे या एकमेव इच्छेने आपण तृणमुल पक्षात प्रवेश केल्याचे त्यांनी सांगितले. मडगावचा बाजार, बस स्टॅण्ड, रेल्वे स्टेशन, पार्किंग प्रकल्प अशा प्रकल्पाकडे कामत यांनी दुर्लक्ष केल्याचा आरोप त्यांनी केला.

यावेळी शिरोडकर यांच्या बरोबर प्रसाद नावेलकर, तकवी सय्यद, सुरेश कारापूरकर, मुसा शेख, अमर कंटक, मिनाझुद्दीन, अब्दुल कादर गाझी व अर्जुन हात्रिकी हेही तृणमुल पक्षात सामील झाले. महेश आमोणकर यांनीही आपण मडगावच्या विकासासाठी तृणमुल पक्षात प्रवेश केल्याचे सांगितले. त्यांच्या बरोबर शिवोली येथील बॅडमिंटनपटू आशुतोष नाईक यांनीही तृणमुल पक्षात प्रवेश केला. यावेळी बोलताना फालेरो यानी तृणमुल पक्षाकडे गोव्याला पुढे घेऊन जाण्याची निश्चित दिशा असल्याचे सांगितले.