Drunk Tourist in Goa: पेडण्यातील कोरगाव येथे मद्यधुंद पर्यटकांचा गोंधळ; पोलिसांना अरेरावी

Drunk Tourist chaos in Goa: गोव्यात पर्यटनासाठी आलेल्या दोन पर्यटकांनी रविवारी मद्यधुंद अवस्थेत पोलिसांशी हुज्जत घातल्याचा प्रकार समोर आला आहे. पेडण्यातील कोरगाव येथे ही घटना घडली आहे.

या घटनेचा व्हिडिओदेखील व्हायरल झाला आहे. पोलिसांनी या दोघांनाही ताब्यात घेतले आहे. त्यांना अटक करण्यात आली आहे.

या दोन्ही पुरूष पर्यटकांनी रेंट अ कार सेवेतून कार घेतली होती. GA 06 T 8332 या कारमधून त्यांनी गोवा दर्शन केले आहे. दरम्यान, त्यांनी जास्त प्रमाणात मद्य प्राशन केले होते. पोलिसांनी त्यांची कार अडवल्यानंतर त्यातील एकाने पोलिस कॉन्स्टेबललाच अरेरावी केली.

पोलिस स्टेशनमध्ये न्या, पण दादागिरी करू नका, असे बरळताना ते पर्यटक दिसतात. यावेळी तिथे महिला पोलिसदेखील होत्या. त्यांच्याकडेही ते संबंधित पोलिसांची तक्रार करताना दिसतात.

तथापि, हे दोन्ही पर्यटक मोठ्या प्रमाणात दारू पिल्याने मद्याच्या अंमलाखाली असल्याचे व्हिडिओतून स्पष्ट दिसते. या दोन्ही पर्यटकांनी सार्वजनिक ठिकाणी शांतता भंग करण्याचा प्रयत्न केला.

तसेच या सर्व प्रकाराचा व्हिडिओ करणाऱ्यालाही ते अरेरावी करताना दिसतात. या सर्व प्रकाराबाबत नाराजी व्यक्त करण्यात येत होती. गोव्यात येऊन अशा पद्धतीचे वर्तन करणाऱ्या पर्यटकांवर कारवाई करावी, अशी मागणी होत आहे.